Immat seernarnerulerput
Ikummatissanik atuinitsinni CO2-p silaannarmut aniatitta ilaa imaanut pisarpoq. CO2 imaanut akulinnermini seernartunngortarpoq imaatalu pH-ata kisitsisitaata apparneranik kinguneqartarluni.
Issittumi Siunnersuisooqatigiit Kiruna sapaatit akunnerata siuliani ataatsimiinneranni siunnersuisooqatigiit suleqatigiissitaasa ilaat, Amap, Issittumi imaata seernassusaata qaffakkiartornera pillugu nalunaarusiamik saqqummiussaqarput. Imaata seernassusaata qaffakkiartornera Issittumi Siunnersuisooqatigiit ataanni aatsaat sammineqalerpoq. Ilisimatuussutsikkut sulaqartut 60-it missaat nalunaarusiamut ukiuni pingasuni suliarineqarsimasumut suleqataasimapput.
Amapip nalunaarusiaa naapertorlugu, immap qaavata seernassusaata agguaqatigiissinnera, nunarsuaq tamaat eqqarsaatigissagaanni, ukiuni 55 millionini aatsaat taama qaffasitsigaaq. Suliffissuaqarnerup aallartisarneqarnerata nalaanut naleqqiukkaanni 30 procentinik ullumikkut qaffasinneruvoq. Tamanna pingaartumik Issittumut tunngatillugu ajornartorsiutaavoq, imaata nillertuunera pissutigalugu CO2-mik annertunerusumik katersuuffiusarmat.
Imaviit seernassusaasa qaffakkiartornerat arlalinnik pissuteqartumik ilungersunartuuvoq. pH-p kisitsisitaata appariartornerata ilutigisaanik Issittup Imartaviani pinngortitami ataqatigiinnerup allanngoriartornissaa ilisimatuunit naatsorsuutigineqarpoq. Aataasat, nerpissuut eqqusallu imaata seernartikkartorneranik sunnigaanerpaajunissaat ilimagineqarpoq. Tamannalu Issittumi aalisarnermut kingunerlutsitseratarsinnaasoq, Amap naliliivoq.
Imaviit seernassutsimikkut qaffannerat imaaliannaq appariartulernavianngilaq. Ilisimatuut naliliinerat malillugu CO2-mik aniatitsineq ullumikkut unitsinneqaraluarpalluunniit ukiut tuusintit arlallit qaangiuppata aatsaat maanna seernartumik mingutsitsineq iluarsisinnaassaaq.
Imaata seernassusaata qaffakkiartornera pillugu ilisimasat ikitsuinnaapput, pingaartumik Issittumut tunngatillugu, taamaammat ilisimatusarfigineqarnerunissaa suleqatigiissitanit inassutigineqarpoq.
