Immat killingat sukkasuumik qaffariartussaaq
Silap pissusaa pillugu Naalagaaffiit Peqatigiinni paasisimannilluartut februaarimi 2007-imi siulittuutigaluarpaat, nunarsuatsinni immat 18 centimeterit 59 centimeterillu akornanni ukioq 2100-mi qaffassimassasut. Ilisimatusarnerilli nutaat takutippaat kisitsit taanna immaqa appasippallaartoq.
- Nunarsuatsinni immat meteri ataaseq tikillugu ukiuni hornorujulikkaani makkunani qaffassimanissaat piareersimaffigisariaqarparput, Tysklandimi illoqarfimmi, Potsdamimi, silap pissusaa pillugu ilisimatusarfimmi pisortaq, Joachim Schellnhuber, oqarpoq. Tysklandimi naalakkersuisut avatangiisit pillugit apeqquteqaateqaraangata ilisimatusarfimmit tassannga siunnersorneqartarput.
Tyskit ilisimatuut taama inerniliinerannut pissutaavoq, Himalayami sermeq aamma Kalaallit Nunaanni sermersuaq ukiuni kingullerni ilimagisamit sukkanerusumik millisimammata. Gassinik silaannarmik kissakkiartortitsisartunik Kinap aniatitsinerata annertusiartuinnarnera tamatumunnga pissutaasoq, Scheellnhuber oqarpoq.
