Immaqa misiligutinik katersivissuarmiipputit

Takorlooriaruk qallunaat tamarluinnarmik timaasa ipiutaasartaannit aamma aaversinnerinit misiligutinik paasissutissanik katersivissuaq. Tamatumunnga peqatigitillugu misiligutit paasissutissanik qallunaat ilaqutariinnerinut, inuunerminnilu nappaatinut nalaassimasaannut qanorlu katsorsarneqarsimanerinut tunngasunut atorneqarsinnaanissaat aamma takorloorneqarsinnaavoq.
Allattoq Elisa Isaksen
marsip 21-at 2012 06:57

Tamanna siunissamut takorluukkersaarutitut nipeqarsinnaagaluartoq, Naalagaaffiup Nappaatinut Akiuussutissaliorfiata - Statens Serum Institutip - takorluugaq tamanna piviusunngortereersimalerpaa.

Tassami nappaatinut akiuussutissaliorfik inuit timaannut paasissutissanik katersivimmik ammaaqqammerpoq, tassanilu qallunaat 4 millionit missaanniittut aaversinnerinit timaasalu ipiutaasartaannit misiligutit toqqortaatigineqarput. Tamatumunnga peqatigitillugu katersivimmi tassani misiligutit kalaallit 30 procentiineersut aamma pigineqarput, soorluttaaq misiliguterpassuit Savalimmiuneersut Islandimiuneersullu aamma pigineqartut.

Ilisimatuut nunarsuatsinni nunanit tamaneersut aamma qilanaalereersinnaapput. Tassami taama katersiveqalernikkut inuup timaanut paasissutissanik misiligutinik millioninik arlalinnik amerlassusilinnik, innuttaasut ilarpassuinut tunngasunik toqqortanik paasiniaasinnaalissagamik.

Ilisimatuummi nunarsuarmi sumi tamaneersut taamaalillutik nuna tamakkerlugu nappaatillu nunami tassani nassaassaasut malinnaaffigisinnaalissavaat. Seruminstitutimi atorfillip professor Mads Melbyep aamma oqaatigaa, taama katersaateqalernikkut nakorsaatinik imaannaanngitsunik siunissami nassaartoqarsinnaalissasoq.

Misiligutinik katersivik 179 millionit koruuninik akeqartoq, ullumi pisortatigoortumik ammarneqarpat, nunani tamalaani tusagassiortut saniatigut ilinniartitaanermut ministeri Morten Østergaard aamma nunat EU-mut ilaasortat sinniisui arlallit peqataassapput.