Immap sikuata aakkiartornera nutaanik periarfissiivoq

Issittumi avatangiisit pillugit, sakkutuunullu imarsiortunut kingunissai, USA-mi sakkutuut imarsiortut naliliinerat nutaaq sapaatip-akunnerani uani saqqummiunneqarpoq.
Naliliineq issittumi siunissami periusissanut, aamma niuernikkut ingerlatanut, sunniutilerujussuanngorsinnaavoq.

Sakkutuut imarsiortut naalagarsuat, Admiral David Titley, sakkutuut imarsiortut silap allangoriartorneranut tuungatillugu ataatsimiittartoqatigiivini aqutsisuusoq, aviisimut Defence News-imut oqarpoq, issittumi nunat sumiiffiillu siornatigut tikinneqarsinnaanngingajannikuusut. Maannakkulli immap sikuunikinnerusalerneranik pissuteqartumik, ilaatigut uuliasiornermut gas-imillu qalluinermut, umiarsuit ingerlaartarnerannut, inuussutissarsiutigalugu aalisarnermut takornariaqarnermullu kingumut utersaartumut atatillugu periarfissarpassuit nutaat takkussuussimasut.

Admiral David Titley-p ilanngullugu oqaatigaa, nunarsuup sananeqaataa maanna allanngoriartulersoq taamaalillunilu ukiut 500-it ingerlaneranni siullerpaamik nutaamik nunarsuaq imarpeqalerumaartoq. Sakkutuut imarsiortut allagaataanni takuneqarsinnaavoq, issittup imartaa aasaanerani ukiut 25-it ingerlaneranni sikuussaarumaartoq.

Siunissami pinngitsoorneqarsinnaajunnaassaaq issittumi naalagaaffiit imminnut suleqatigiittariaqarnerat illersornissakkullu sungiusaqatigiiittarnerit ingerlannerit ingerlanneqartariaqassallutik.

Tamatuma saniatigut pisariaqassaaq sineriammi attaveqaatinik pitsaanerusunik, ingammik ajunaarnersuaqartillugu ikiuuttartussanik, pilisersitsinissaq, aammalumi issittumi inuit najugallit pillugit kiisalu silap pissusaata sunniisarneri pillugit ilisimasaqarnerusariaqarnerput pisariaqartoq, Amerikami sakkutuut imarsiortut nalunaarusiaanni naqissuserneqarpoq.