Tele-Post: Immap naqqatigut kabelit qaqugu aaqqikkumaarnersut nalunartoq
Youtubemi soqutiginartumik isiginnaarusutsillutit imaluunniit nittartakkami arlaannik atuaarusullutik internetip arriippallaarneranik nittartagaq ammarsinnaanngitsoq misiginikuusimassajunnarsivat.
Immap naqqatigut kabeli kujataani kisima ajoquteqanngilaq, avannaanimi immap naqqatigut kabeli aamma ajoquteqalermat, avannaamiut naammagittaannartariaqarput.
- Atuisutta malugissavaat internetimut attaveqaatit kingaannerusut, angerlarsimaffimmi mobiilikkullu attaveqarniarunik, Tele-Postip avammut tusagassiisartua Paarnaq Hansen oqarpoq.
Maniitsup avannaani attaveqarniarneq maanna sakkortusaavitsigut ingerlanneqarpoq, taamaattoqarneratalu oqarasuaatitigullu angallattakkatigut internetsersinnaaneq aamma arriinnerulersikkaa Paarnaq Hansen oqarpoq.
- Kisianni sianerneq mobiilinullu sianernerit ajoquteqanngillat.
Kujataani immap naqqatigut kabelip ajoqutaa ingerlaannaq aaqqinneqarsinnaasoq Tele-Postip naatsorsuutigisimagaluarpaa, umiarsuarmilli ajoqutaasumut suliaqariartorsinnaasumik pissarsiniarneq ilimagisamit ajornakusoornerusimavoq. Maannali umiarsuassarsisoqareerpoq taannalu Canadamit nunatsinnut ingerlaarpoq.
- Angallammut attaveqarpugut taakku aggilerput imaatigut kabelit avannaani kujataanilu ajutooqqasunut aaqqissuiartorlutik. Kisianni oqaatiginissaa ajornarallarpoq qaqugorpiaq suliarineqarneri aaqqissanersut, TelePostip avammut tusagassiisartua Paarnaq Hansen oqarpoq.