Immap naqqatigut kabeli aqagu ajorunnaassaaq

 Kabelip immap naqqatigoortup Nunatta Canadallu akornanniittup qaammatip matuma aallartinnerani ajoquteqalersup ajoqutaa, Umiarsuup kabelinik suliarinnittartup, maanna   sumiissusersisimalerpaa.

Attaveqaatip ajoquteqalernera, Nunatsinni internetimik atuinermut sunniuteqarnavianngitsoq, TELE-POST-imit taamani oqaatigineqaraluarpoq. Ullulli arlaqanngitsunnguit qaangiummata allamik paasisaqarpugut.

Kabeli Danmarkimiittoq Viborgip Herningillu akornanni ajoquteqalermat, Danmarkip Islandillu akornanni attaveeruppoq, taamalu Nunatsinnut aamma attaveerulluni.

Tamanna pissutigalugu Nunarput internetikkut avammut attaveerussimasoq, maajip arfineq pingajuanni ullaakkut iterpugut.

Maannali kabelip immap naqqatigoortup Canadamut aqqutaani sumiissusersineqarnerata kinguneranik, attaveqaatip isumannaannerulernissaa naatsorsuutigisinnaassavarput.

Sila ajussanngippat kabelip Canadap Nunattalu akornanniittup aqagu iluarsineqarsinnaanissaa, TELE-POST-ip naatsorsuutigaa.

Kabeli immap naqqatigoortoq aalisartunit ajoquserneqarsimasoq, umiarsuup kabelinik suliarinnittartup paasisimagaa, nalunaarummi oqaatigineqarpoq.