Assi: KNR

Immap naqqatigut kabeli aalisartunut Youtubekkut USB-llu atorlugit paasititsiniaassutigineqartoq

Kilisaat rajarniut immap naqqatigut kabelip kittorarneranut Telepost naapertorlugu pisuuvoq, Telepostilu kabelip kittoraqqinnissaa ingalanniarlugu nutaamik paasititsiniaavoq.

Kabelersuaq paaritigu.

Telepost, KNAPK, Royal Greenland aamma Polar Seafood suleqatigiillutik tamanna pillugu paasititsiniaanerat nutaaq taama qulequtaqarpoq.

Immammi naqqatigut kabeli kittoraraangat inuppassuit tv-mut, internetimut oqarasuaatinullu angallattakkanut attaveqarnerat kipiluttunarsisarpoq.

-  Immap naqqatigut kabeli kittoraraangat ajorluinnartumik pisoqartarpoq. Taamaattoqaraangat innuttaasut netbankitik atorsinnaajunnaartarpaat, piniarnermut akuersissummik qinnuteqaateqarsinnaajunnaartarput ernuttaminnllu internetikkut oqaluussisinnaajunnaartarlutik, Telepostimi teknikkimut pisortaq Jonas Hasselriis tusagassiorfinnut nalunaarummi nassuiaavoq.

AAMMA ATUARUK Telepostip kilisaataatileqatigiiffik taarseeqqullugu eqqartuussivilersuukkaa

Immap naqqatigut kabelip paarinissaanik immiussaq ilaatigut Youtubekkut paasititsiniaassutigaat. Kilisaatip naalagaata KNAPK-llu aalisarnermik inuussutissarsiutillit immap naqqatigut kabelip paarinninnissaannut kajumissaarpaat.

Telepost USB-nik aalisariutaatilinnut angallataateeraatilinnullu paasissutissanik isumaminnik nutarterisartunik atortorissaaruteqanngitsunut aamma agguaavoq. Immap assinga nutartigaq elektroniskiusoq USB-nut taakkununnga nuunneqarpoq, immallu naqqatigut kabelip sumiiffia tassani takuneqarsinnaavoq.

Søkabel-USB

- Tamanna sullissilluarneruvoq, uagullu akisussaanermik tiguseqataavugut aalisartullu tamaasa immap naqqatigut kabelimik paarseqataaqqullugit kajumissaarlugit, aamma naak aalisagaqarluartuni inissisimagaluarpalluunniit, KNAPK-p pisortaa oqarpoq.

Akisoqisoq

Aammalumi immap naqqatigut kabelimik aqqutaluginninneq akisoorujussuusinnaavoq.

Telepostimmi kilisaat raajarniut immap naqqatigut kabelimik pingasoriarluni ajoqusernikumik 2019-ip aallartinnerani aqqutaluginnittoq kabelip kittorarneranut pisuunerarpaa.

Telepostip Ilulissani kilisaataatileqatigiiffik 9,3 millionit koruuninik taarsiivigeqqulluni eqqartuussivilersuuppaa, isumaqaramimi kilisaatip raajarniutip kabeli kittorarsimagaa. Kilisaataatileqatigiiffiulli kabelip kittorarneranut pisuunnginnerarpoq. Suliaq eqqartuussivimmi suli suliarineqanngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat