Immap naqqanik saliineq pillarneqaatigaa
Sinerissap qanittuani qaleralinniarsinnaanermut peqqussut nutaaq naapertorlugu akuersissummik pigisaqartut pisassiissutinit pigisassaannik aalajangersaasoqarpoq, aalisariummik 6 meterinik anginerusumik aalisariutillit ukiuni kingullerni pingasuni qaleralittassimassaat tunngavigalugit - agguaqatigiissitsinikkut pisassiissutigineqassasut.
Ilulissani aalisartut aaqqissuussinermut nutaamut naammagittaalliortut ilagaat Henrik Sandgreen, 45 fodimik angitigisumik, ”Jens Henrik”-mik aalisariutitaatitalik. Aalisariut ukiuni kingullerni 280 tonsinik Qeqertarsuup Tunuani qaleralissimavoq.
- Taamaallaat 48 tonsinik qaleralittassinneqarpunga, Henrik Sandgreen pisasssiitugineqartunut tupigusuuteqaqisoq oqarpoq.
Henrik Sandgreen isumaqarpoq peqqussut nutaaq naapertorlugu qaleralinnik 90 tonsinik pisassinneqartussaassagaluarluni, ukiuni kingullerni pingasuni 280 tonsit missaannik qaleralissimagami..
- Pisassiissutigineqartut nunguppata aalisakkat allat saattariaqassavakka, Henrik Sandgreen erseqqissaavoq.
Aalisariutaa ukiuni kingullerni aalisartuaannanngilaq Upernaviup eqqaani qassutikunik immap naqqaniittunik ukiut marluk-pingasut matuma siorna aamma saleeqataasimavoq.
- Eqqortuussinnaanngilaq aalisakkanut allanut saattariaqalernera. Tonsinimmita qassinik qaleralissimassagaluarpunga qassutikunik piaanermut peqataasimanngikkaluaruma, Henrik Sandgreen, Qeqertarsuup Tunuani ukiuni kingullerni 20-ni qaleralinniartuusoq oqarpoq.
Peqqussut nutaaq aalisartut ataasiakkaat pisassiissutinit pigisanit tuniniaanissaannut tunngaveqarpoq. Pisassiissutinit pigisat aningaaserivinni taarsigassarsiniarnerni ilaatigut qularnaveeqqutitut atorneqarsinnaassapput.
Aalisarnermut Naalakkersuisoqafiup kisitsisaatai naapertorlugit qaleralinniarsinnaanermut akuersissutaatillit 609-upput, aalisariutillit 6 meterinik anginernik. Qeqertartuup Tunuani 202-it, Uummannami 215-it Upernavimmilu 192-it.