Avatangiisit

VIDEO Immap naqqanik sajuppillatsitsisarneq Greenpeacemit isornartorsiorneqarpoq

Tunup avannaani uuliasiorniarnermi immap naqqanik sajuppillatsitsilluni misissuinerit ingerlanneqaleruttorput. Misissuinerilli miluumasunut, tappiorarnartunut aalisakkanullu akornusersuillutillu ulorianartortitsisinnaapput, Greenpeacemiit isornartorsiorneqarpoq.

Allattoq Pipaluk Høegh

aggustip 19-at 2015 19:45

Greenpeacep umiarsuaa Arctic Sunrise 22-nik inuttaqarluni Nuummiit tunup avannaa siunnerfigalugu ippassaq aallarpoq.

- Taavani sajuppillatsitsilluni misissuisoqarnera ilumut naapertuuttuunersoq, taamalu avannarpasitsigisumi uuliasiortoqarnissaa Kalaallit Nunaanni ilumut siunnerfiunersoq pitsaasoq neriuutigigatsigu oqallisaalissasoq, Greenpeacemi suliniummut ataqatigiissaarisoq, Sune Scheller KNR-imut oqarpoq.

Tunup avannaani sumiiffimmi 10.000 kilometerinik annertussuseqartumi sajuppillatsitsilluni misissuiffigineqarnissaa Naalakkersuisunit akuersissutigineqarpoq. Suliffeqarfik Norgemeersoq TGS misissuisuupput.

Aamma atuaruk Greenpeace Nuummiunit tikilluaqqusaavoq

Tunumili sajuppillatsitsilluni misissuinerit KNAPK-miit aamma akerlerineqarpoq. Assersuutigalugu tunup kujataani saarulliit innarlerneqarnissaat aarleqqutigaat.

- Sajuppillatsitsinerup nalaa aasakkut ilimanarsinnaalluni saarulliit tukertitaat ikerinnarmiittut aqqusaarneqarunik toqorarsinnaagamik, KNAPK-mi uumassusilerisoq, Bjarne Lyberth KNR-imut oqarpoq.

Aamma atuaruk ASSIT Greenpeacep umiarsuaanut alakkartereqataagit

Miluumasulli soorlu qilalukkat, aarrit arferillu tunup avannaani aamma sajuppillatsitsilluni misissuinermi nipit 259 decibeli immap naqqata tungaanut ingerlaartinneqarnerani ilaatigut siutaasa ajoqusersinnaanerat aarleqqutigineqarpoq.

- Sajuppillatsitsilluni misissuinerit ajornartorsiutaapput, nipi sakkortoorujussuaq immakkut ingerlaartinneqartarmat, tamannalu sumiiffinni miluumasunut akornusiisinnaasarluni, Sune Scheller oqarpoq.

Aamma atuaruk Greenpeacekkut nuannarineqarusuttut

Uuliasiorlunili qillerisoqalissappat aamma kingunissai aarleqqutigineqarput.

- Tasiilap kujataata kangiani uuliaarluartoqarpoq, takuarpullu danskit nakkutilliisuisa piffissaatillugu apuunniarnerat qanoq ajornakusoortigisimanersoq, taamaammat takorloorneqarsinnaavoq avannarpasinnerusumi pisoqassappat qanoq pisoqarnissaa, Sune Scheller oqarpoq.

Aamma atuaruk Uuliasiortut arferit mianerinerusariaqarpaat

Aamma atuaruk ICC: Sumiiffiit illersukkat qimassigit!

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.