Immap naqqanik misissuisut arferit mianersuuttariaqarpaat
Pinngortitaleriffiulli, Danmarkimilu avatangiisit nukissiornerlu pillugu misissuisoqarfiup, DCE-p, innersuussinerat malillugu taamatut misissuisoqalerpat qilalukkanik siornatigumut naleqqiullugu mianerinninnerunissaat kissaatigineqarpoq.
Innersuussutillumi Aatsitassanut Ikummatissanullu Pisortaqarfiup tungaaniit uuliasiorluni misissuinissamut qinnuteqareersunut kinguneqarnissaa naatsorsuutigineqalereerpoq:
Uuliasiorluni misissuinissamut qinnuteqareersunut piumasaqaateqarnerulernermik innersuussutigineqartoq kinguneqartussaassaaq, taakkulu tamarmik qinnuteqataataasa akuerineqarnissaat qulakkeerneqarnissaa naatsorsuutigissanngilaat, Aatsitassanik ikummatissanullu pisortaqarfimmi pisortaq Jørn Skov Nielsen oqarpoq.
Nipi atorlugu immap naqqanik misissuisoqaraangat immap qaavani silaannaq atorlugu qaartitsinertut ittunik nipiliortoqartarpoq, nipilu immap naqqanukariarluni uteqqikkaangat umiarsuarmi immiunneqartarluni. Tamatuma kingorna immap naqqata sananeqaataa takuneqarsinnaanngortarpoq, immallu naqqani uuliaqarnersoq paasinarsisarluni.
Danmarkilli avatagiisinut nukissiuteqarnermullu misissuisoqarfiata DCI-p immami uumasorsiuuisa nipit atorneqartartut arfernut akornutaasinnaaneri ernummatigaat, taamaasillunilu uuliamik ujaasisussanut piumasaqaatit sukaternerinik kinguneqarsimalluni.
Ukioq manna Baffinip kangerliumarngani misissuisoqalerpat piumasaqaataasussat ersarilluinnartussaassapput, misissuinissammi aggustimi aatsaat pisinnaassapput, qilalukkammi ingerlaarlutik qaangiuteqaarnissaat utaqqeqqaarneqartariaqarmat, Jørn Skov Nielsen oqarpoq, imalu nangilluni:
- Uuliasiorfiutileqatigiit paasissutissanik katersinissannut periarfissaat annikilleriarsinnaavoq, tassami nipit atorneqartussat qanoq siaruaattarneri nalunaarsortariaqassavaat, tamatumalu saniatigut misissuiffigisami qanoq arfeqartiginersoq timmisartut atorlugit kisitsisoqarnissaa uuliasiorfiutileqatigiit aamma isumagisariaqassallutikku.
Tassa piumasaqaatit nutaat kingunerisaanik uumasut, avatangiisillu uuliamik ujaasisussat mianerinerulertariaqassavaat, tamakkulu 2 million dollarsinik, qallunaat aningaasanngorlugit 12 million koruuninik uuliasiorfiutileqatigiit aningaasartuuteqarnerulernerinik kinguneqassalluni.
Uuliasiortitseqatigiit nipi atorlugu immap naqqanik misissuinissaannut ukioq-manna qinnuteqaataat, sapaatip-akunnerisa marlussuit ingerlanerini naammassineqarnissaat Jørn Skov Nielsenip naatsorsuutiginerarpaa.
