Immap assingi tallimat ukioq-manna naammassissapput

Nunatsinni imarsiornermi maleruaqqusassanut siunnersuut naalakkersuisunut juulimi naammassilluni saqqummiunneqartussanngorpoq.

Nunatsinni umiatsiaararsorluni angallannermi sillimaniarnikkut inatsimmik maleruaqqusaqanngilaq, ukiullu pingasut ingerlanerinnaani 2004-mi 2006-imilu inuit 42-t immakkut ajunaarsimapput, Lene Riis Namminersornerullutik Oqartussani suleqatigiissitaliami sullissisoq radioavisimut oqarpoq.

Tamannalu iliuuseqarfiginiarlugu suleqatigiissitaliaq Namminersornerullutik Oqartussani peqataatitaqartoq, politimestereqarfimmiillu nunatsinniit peqataaffigineqartoq, Danmarkimit Illersornissamut ministereqarfik, Aningaasaqarnermut ministereqafik, Imarsiornermik Qullersaqarfik, Sillimaniarnermut Aqutsisoqarfik, Illersornissamullu qullersaqarfik peqataatitaqarput. Suleqatigiissitaliaq Illersornissamut ministereqarfimmit siulittaasuuffigineqartoq Lene Riis oqarpoq.

Suleqatigiissitaliaq nutaanik nunatsinnullu tulluussakkanik maleruaqqusaliornissamut siunnersuutissanik naalakkersuisunut juuli qaammat naatinnagu saqqummiussisussaapput. Ilaatigut imigassartorsimalluni umiatsiaararsorneq pineqaatissiissutaasinnaanngorlugu siunnersuutigineqarniarluni. Umiatsiartaarnermilu sillimaniarnissamut atortut ilaareertartussanngorlugit inatsiseqalernissaa siunnersuutinut aamma ilaatinneqassasoq Lene Riis oqarpoq, nangillunilu,

-Immap assingi nutaat siulliit ulluni makkunani misilittarneqaleruttorput naatsorsuutigineqarlutillu ukioq manna immap assingi katillutik tallimat naammassineqassasut. Ukiullu 2008-p 2009-llu ingerlanerini immap assingi 50-it missaannik amerlassusillit Diskobugtimiit kujammut Nunap Isua tikillugu naammasineqarnissaat nunap immallu assinginik aqutsisoqarfiup naatsorsuutigaa, kingornalu nunatta sinnerani immap assinginik nutarterinissaq piareersarneqalissasoq Lene Riis radioavisimut oqarpoq.