Immap assingi nutartertariaqalersimapput

Uuliamik assartuut ikummatissanik 9,5 millionit liiterinik usisoq, Sullualukkoortilluni sapaatip akunnerani kingullermi ikkarlippoq.

Tamanna sioqqutilaarlugu umiarsuaq takornariartaat, qallunaanit pigineqartoq, Canadap avannaani ikkarlummut ilisimaneqanngitsumut ikkarlippoq.

Aamma pisut taakku marluk ajutoornertaqanngitsumik, tassa ajunaartoqaranilu uuliamik maqisoortoqanngikkaluartoq, tamaani immap assingisa nutartertariaqalivinnerat maluginiarneqarpoq.

Umiarsuarnik angallannermut nakkutilliisoqarfiup issittumut immikkoortortaani pisortap oqaatigaa, immap assingisa nutarterneqarnissaannik piareersaaneq maanna salliutinneqalissasoq.

- Immap assingi tamakkiisuunngillat, tassami immap assiliorneqarsimasoq qimakkukku imartamut ilisimaneqanngitsumut periaannaagavit, pisortaq CBC Newsimut oqarpoq.

Tamannami imartami navianartoqaqisumi umiarsuit angalaniartut amerliartuinnartillugit ajornartorsiutaalersinnaammat.