Immanuelsen: Ineqarfiliornissaq soqutigineqanngilaq

Atuartunut annernut Upernaviup nunaqarfiineersunut ineqarfiliornissap ukioq manna aallartinneqarnissaanik, Upernaviup kommuneqarfia upernassarli qinnuteqartoq, borgmester Jens Immanuelsen oqarpoq. Tamanna pillugu Upernaviup kommunea, aatsaat 2008-mi ineqarfiliornissamik pilersaaruteqarnerarlugu, Ilinniartitaanermut naalakkersuisup, Doris Jakobsenip, saqqumiussaqarnera eqqunngitsoq, Upernaviup borgmesteria Jens Immanuelsen oqarpoq.

Jens Immanuelsen ima tunngavilersorpoq:

- Kommunalbestyrelsi sanaartugassanik marsip aallaqqaataa sioqqullugu ukiut tamaasa tulleriiaarisarpoq. Ukioq mannalu tamanna aamma naammasineqarpoq, aappaagu aningaasanut inatsisissamut ilanngunneqartussanik siunersuutit Namminersornerullutik Oqartussanut nassiunneqarput februaarip 23-anni.

Jens Immanuelsen oqarpoq aappaagu aningaasanut inatsissatut siunnersuummut ilanngunneqartussatut ineqarfiliornerup ukioq manna aallartinneqarnissaa erseqqissumik qinnutigisimagitsik. Aningaasanut inatsisisaq saqqummiunneqarmat kissaatigisartik takusinnaannginnamiuk Immanuelsen Ilinniartitaanermut Naalakkersuisumut saaffiginnissimanerarpoq maannamulli akineqanngitsumik.

- Soqutigittaannertut oqaatigisariaqarpoq, pissutigalugu apeqqut ilungersunartuummat, allaat kommunalbestyrelsimi immikkut ittumik suliarisariaqarsimallutigu, meeqqat atuartussaatitaammata. Taamaattumik taama soqutigineqanngitsutut innera assut ajuusaarnarpoq.