Saattuarsuimmi, kamchatkap saattuarsuinik aamma taaneqartartut, nunatta imartaata kissatsikkiartornerani sermersuullu aakkiartornerani nunatta imartaaniileratarsinnaanerat ilimanarluinnarpoq. Assi: Flickr / Creative Commons - Robert Nunnally

Immami uumassusilinnik ilisimatuut: Kalaallit Nunaata imartai saattuarsuaqalerataannaapput

Uumasoqatigiiaat takornartat assigiinngitsorpaaluit - soorlu saattuarsuit - nunatta imartaaniilerataannaasut, nalunaarusiami nutaami erserpoq.

Immap naqqani nerisassarsiornerminni assaatigisartakkaminnik aasiattungajak takisuunik nioqarput. 

Atamaakkajupput, nerisassarsiorlutillu nunatta imartaalerataannaapput.

Taakkua saattuarsuarnik ateqarput. 

Saattuarsuimmi, kamchatkap saattuarsuinik aamma taaneqartartut, nunatta imartaata kissatsikkiartornerani sermersuullu aakkiartornerani nunatta imartaaniileratarsinnaanerat ilimanarluinnarpoq. 

Uumasoqatigiiaat takornartat suuppat?

Tassaapput uumasoqatigiiaat takornartat sumiiffinnaaminniinngitsut. Taakkua najulikkamik uumasoqqaavisa naasoqqaavisalu aarlerinartorsiortitaanerannik allaat kinguneqartumik siaruaatipiloorsinnaallutillu amerlipiloorsinnaapput.

Tamannali ajornartorsiutaasinnaasoq, immami uumassusilinnik ilisimatooq Aarhus Universitetimilu ilisimatuujuneq Kim Gustavsen naliliivoq.

AAMMA ATUARUK Tunisassiorfinni saattualerisartut sisamararterutaat sapigaqalernissamut qanittut

Uumasoqatigiiaat takornartat sorliit nunatta imartaaniilerataannaanersut, taassuma Pinngortitaleriffik suleqatigalugu misissorpaa.

Saattuarsuit imartatsinniilerataannaasutut ilimanaateqaqisut, ilisimatooq naliliivoq. 

- Saattuarsuit angisoorujussuupput. Immap naqqatigoornerminni aqusaakkatik tamangajaasa nerisarpaat.

- Tassa imaappoq, aalisakkat ilaat malunnartumik nerisassaalatsilersinnaapput. Saattuarsuit immap naqqani uumassusillit ataqatigiiaarnerannut sunniuteqarsinnaaqaat, taanna oqarpoq. 

Taamaammat saattuarsuit uumasoqatigiiaat takornartatut nunatsinni oqaatigisassaapput. 

Ruslandimiit Norgemut kingornalu Kalaallit Nunaannut

Saattuarsuit Ruslandip kangisissuani qeqertaasami Kamchatkami uumasoqqaajupput.

Aalisartulli uumassusilerituullu tamakkuninnga Ruslandip avannaata kitaanut ukiut ingerlanerini siammaapput.

- Saattuarsuit tamatuma kingorna kujavarlutillu kujammut sarfaassaammata, Norgep kimmut sineriaa maanna saattuarsuaqarfiuvoq. Tamaani aalisarnermut sunniuteqartumik immami uumassusillit ataqatigiiaarnerannik innarliipput, Kim Gustavsen oqarpoq.

Taakkualu maanna nunatta imartaaniilerataannaapput. 

- Nunattalu imartaata kissatsikkiartornerani sikukinneruleriartorneranilu silap pissusianik missingersuutit naapertorlugit siaruaatipiloorataannaapput, Kim Gustavsen oqarpoq.

AAMMA ATUARUK Saattuartassat taamaaginnarnissaat Pinngortitaleriffiup inassutigigaa

Saattuarsuit ingerlaaginnaratik sarfaassaaginnaratillu umiarsuarnit usigineqarnermikkut sumiiffinnaaminnitt ungasissorujussuarmi najuligaqartarput. 

Imeq kitsimaqut suua?

Umiarsuit assartuuterpassuit uaavallaannginniassagamik imermik oqimaaloqutaqartarput. Imeq taanna immameersuummat takornartanik uumasoqatigiiaaqarsinnaasarpoq. 

Imaanngilarli umiarsuit peroreertunik saattuarsuaqartaqisut, saattuarsuilli piaralaajutillutik soorlu umiarsuup kitsimaqutaani imiusumiissinnaasarput.

Umiarsuaq kitsimaqumminik imaarsigaangat taamaalillutik allamiilersinnaasarput. Saattuarsuilli nunatta imartaaniilerataannaasuni kisiartaanngillat. 

Ilisimatuummi nunatta imartai takornartarnik assigiinngitsorpaalunnik, Issittup imartaani uumassusillit ataqatigiiaarnerannik innarliisinnaasunik, uumasoqatigiiaaqalersinnaasorigaat, nalunaarusiaanni aamma erserpoq.

Inatsisartut imeq kitsimaqut oqallisigileruttoraat

Nunarput, nunatta imartai takornartanik erngup oqimaaloquttap kuutsinneratigut uumasoqatigiiaaqalinnginnissaannut, inatsiseqareerpoq. Inatsit taanna 2017-imi atuutilerpoq. 

Inuussutissarsiortulli naleqqussarsinnaaqqullugit ikaarsaarnissaanissamut aaqqissuussisoqarpoq. Taamaammat tamatumani maleruagassat aatsaat aggustimi atuutilerput. 

Inatsisartut imeq kitsimaqut ukiaanerani maanna ataatsimiinnerminni oqallisigileruttorpaat. Nunarpullu Naalagaaffiit Peqatigiit nunat tamalaat imarsiornermut suleqatigiiffiata, IMO-p, imeq kitsimaqut pillugu isumaqatigiissutaanut ilanngutissasoq, nunatsinni politikerit isumaqatigiipput.

Danmark isumaqatigiissummut ilaareerpoq, nunattali peqataaffiginngisaanik. 

Nunarput isumaqatigiissummut ilannguppat nunatta iluaqutigissagaa, Kim Gustavsen oqarpoq. Umiarsuilli nunatta imartaanukartut maleruagassanik taakkuninnga malinninnersut qulakkeerniarlugu nakkutigineqarnissaat aamma pisariaqarpoq.

Tamatuma saniatigut nunatta imartaa takornartanik uumasoqatigiiaaqalersimaneranik misissuisarnerit nalinginnaanerulertariqartut, ilisimatuujuneq naliliivoq. Soorlu piniartut aalisartullu uumasoqatigiiaanik takornartanik pisaqarsimasut oqartussanut nalunaaruteqaqqusarnerisigut taamaaliortoqarsinnaavoq.

Nunattami imartaata saattuarsuaqaleratarsinnaanera taamaaliornikkut immaqa ingalassimaarneqarsinnaammat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat