Immakkut kabelip atoqqaartinneqarnerani inuit 16-it Nunatsinniit peqataatinneqarput
Immakkut kabelip Newfoundlandimi Miltonimi nunami stationeqarfiata pisortatigoortumik atoqqaartinneqarnerani inuit 16-it Nunatsinniit peqataatinneqarput. Aviisimi Atuagagdliutini tamanna allaaserineqarpoq, naatsorsorsimavaallu angalaneq 100.000 koruunit sinnerlugit akeqartoq - akileraartartunit akilerneqartoq.
Allattoq Mads Lynge
Tele Greenlandimi siulersuisuni ilaasortat arfineq-marluk angalaqataapput Tele Greenlandip pisortaqarfianit arfinillit, Naalakkersuisunut ilaasortaq, Jens B. Frederiksen atorfillillu marluk.
Tele Greenlandip siulersuisuini siulittaasup, Kaj Egedep aallartitat amerlavallaannginnerarpai.
- Tikeraarnitta annertunerpaamik maluginiarneqarnissaa anguniarneqarsimavoq aamma provinsimi naalakkersuisut ataatsimeeqatigaavut, Kaj Egede Atuagagdliutinut ilaatigut oqarpoq.