Immakkut angallassineq iluarsisariaqalerpoq

oktobarip 20-at 2006 07:13

Kujataani kommunit peqatigiiffiata kujataani immakkut angallassineq sakkortuumik uparuarpaa.

- Akuerineqarsinnaanngilluinnarpoq aali ukiumi 2006-imiilluta, angallassineq ajungaarmat inuit najukkaminni mattunneqartalernerat, taama ilaatigut naalakkersuisunut allakkat imaqarput.

Naalakkersuisut Arctic Umiaq Line akisussaaffigilermassulli immakkut angallassineq pinngitsoorani aaqqinneqarsinnaasariaqaraluartoq taakku erseqqissaatigaat.

Nunani allani naalakkersuisut innuttatik angalasinnaaqqullugit aningaasatigut periarfissarsiuunneqartarput, kujataani kommunit Nanortalik, Qaqortoq Narsarlu kattullutik naalakkersuisunut taama allagaat imaqarpoq.

Taakku naalakkersuisunut inatsisartunullu kajumissaaripput angallannermut politikkertik nalilersoqqeqqullugu.

- Nunatsinni sineriak tamaat eqqarsaatigalugu taamaattoqarsinnaanngilaq, allakkat Kristine Raahauge-mit Kiista P. Isaksenimit kiisalu Simon Simonsenimit atsiorneqarsimasut taama allassimapput.