Imilersarissanik qalipakkat kalaalerpaluttut Danmarkip katersugaasivissuanut tunniunneqartut

Andreas Kornerupip imilersarissanik qalipagaanik katersarpassui nunatsinneersunik najoqqutallit Danmarkip Katersugaasivissuata Etnografimut tunngasunik Katersaata akornaanniilerput.
februaarip 15-at 2013 04:58

Andreas Kornerup premierløjtnant J.A.D. Jensenip Kalaallit Nunaannut ilisimasassarsiornerinut peqataasarsimavoq, nunatsinniinnerminilu imilersarissanik qalipaasarsimalluni. Imilersarissanik qalipakkat ilaatigut tassaapput inuit, illut illoqarfiillu, soorlu Sisimiut aamma Nuuk.

Andreas Kornerup 24-inik ukioqarluni tuberkulosemik napparsimalluni toquvoq, imilersarissanilli qaligarpassuaqarsimavoq. Katersat tassaapput imilersarissanik qalipakkat 264-it, taakkulu Danmarkip Katersugaasivissuanut siorna septembarip qaammataani tunniunneqarput. Danmarkip Katersugaasivissua maanna aalajangerpoq katersat taakku Etnografimut tunngasunik Katersanut inissinneqassasut.

- Imilersarissanik qalipakkat Handels- og Søfartsmuseumimit pigineqarsimagaluarput, piffissalli ilaani Danmarkip katersugaasivissuata etnografimut tunngasunik katersaanut inissinneqarsimallutik, tassanngaanniillu ukiuni arlalinni Arktisk Instituttimut atukkiuteqqaneqarsimallutik, Danmarkip Katersugaasivissua nalunaarpoq.

Kalaallit Nunaata sineriaata nalunaarsorneqarneranut Premierløjtnant J.A.D. Jensen sunniuteqartupilussusimavoq, ilaatigullu Aasianniiit Paamiunut immap assinginik suliaqarsimalluni. Aammattaaq sermersuarmi misissuisimavoq, tassanilu Andreas Kornerup ujarassiuutut peqataavoq ilaatigullu nunatani naasut assigiinngitsut 27-it katersorsimallugit.