Imikoorfikkut kuuttut sunniutaat misissuiffigaat

Inuusuttut marluk Danmarks Tekniske Universitetimeersut Sisimiuni kuuffitsigut imikoorfikkullu kuutsitat pinngortitamut sunniutaat misissuiffigaat. Misissuinerit kingunerisinnaavaat nunatsinni imermut kuutsitatsinnut atatillugu sakkortunerusunik malittarisassaqalernissarput.

Katharina ”Ruhjejaru” Roggiero matumani misissukkamik sumut atorneqarnissaat nassuiaateqarfigaa:

- Sisimiuni Kalaallillumi nunaanni erngup atoriikkap sunniutigisinnaasai misissuiffigaagut. Annanut eqqaavimmi qapuk takusinnaasarput misissukkallumi malillugit taakani minguttitsisoqarpoq.

Misissuinerillu atorlugit kalaallit nunaanni minguttitsinerit annikillisarusuppagut, Katharina Roggiaro nassuiaavoq.

Siorna misissuinerit aallartinneqareersimapput, erngullu atoriikkap misilillugu issutigut kuutseqqaarneqartarnissaa siornali aaqqiisoqarnikuuvoq. Katharina Roggierollu massakkut pitsaasumik kinguneqalereersoq takusinnaalereernerarpaa.

Ilinniartut imeq igaffimmit kuutsitaq imikoorfitsigullu kuutsitaq misissuivigaat, aammalu suliffissuarmiit imeq kuutsitaq aamma misissuivigalugu.

Misissuinerit sakkortunerusumik inatsiseqalernermik kinguneqartitsisinnaanerlutik ?

Qularutiginngilara sukaterisoqarnissaanut misissuinerit kinguneqarsinnaasut. Soorunalimi misissuinerit annertunerusut ingerlanneqareerpata, aammami pinngortitap silallu sunniutaasa kingunerisaanik iliusissat killilerneqarsinnaapput.

Mikisunnguamilli saliivilernikkut annertuumik kinguneqarluartitsisoqarsinnaavoq, minguttitsinerlu annikillisarneqarsinnaalluni, qularutiginngilaralu uagut misissuinerput Arne Willumsenip kingornalu allat misissuisussat suliaat pitsanngorsaanissamut sunniuteqarluarumaartut, Katharina Roggiero oqarpoq.

Imermik misissuinerit ukiuni arlalinni ingerlanneqassapput, ukiut tamaasa ilinniartut itisiliillutik nutaanik paasiniaasarnerisigut.