Imigassat EU-meersut Nunavummut eqquteqqusaajunnaarput
Viinninik imigassanillu EU-meersunik Nunavummut eqqussisoqaqqissanngilaq. Nunavummi imigassaq pillugu ataatsimiititaliaq taama nalunaarpoq.
EU-p puisit amiinik eqqusseqqusiunnaarniarnera illuatungilerniarlugu Nunavummi viinninik, whiskynik, imigassanillu allanik EU-meersunik eqqussinissaq inerteqqutigineqalissasoq, Siku Newsimi allaaserineqarpoq.
- Viinninik imaluunniit whiskynik, gininik aamma Grey Goose vodkanik Europameersunik peqartoqarunnaassaaq. Taakku arlaannaalluunniit ukiormanna pisiarineqassanngillat, Nunavummi aningaasaqarnermut ministerip tullia, Chris D'Arcy, oqarpoq.
EU-p puisit amiinik nioqqutissianik eqqusseqqusiunnaarniarnera atuutissappat Nunavummi europamiut imigassaliaannik sassaalliisoqaqqinnginnissaa ilimagineqarsinnaasoq, Chris D'Arcyp oqaatigaa.
Imigassanik Europameersunik tikisitsinermut 300.000 dollarsit nalinginnaasumik atorneqartaraluarput.