Imigassartunnginnerulerpugut
Nunatsinni imigassamik tunisineq appariarujussuarsimavoq.2008-mi nunatsinni innuttaasoq ataaseq agguaqatigiissillugu 12 liiterimik imigassarsisimavoq, kisitsilli taanna siorna 2 liiterimik appariarpoq.
Allattoq Elisa Isaksen
oktobarip 27-at 2010 10:04
Tassa imigassat - matumani pineqarlutik immiaaqqat, viinnit imigassallu, innuttaasumut ataatsimut agguaqatigiissillugu tunineqartut siorna 10 liiterit sinnilaaqqavaat. Nordisk Statistisk Årbogip kisitsisaatai nutaanerpaat taama paasissutissiipput.
Taamaalilluni imigassamik atuineq Danmarkimisut iinnarpoq, tassami maani atuineq appariaraluartoq, nunani avannarlerni Nunarput Danmarkilu agguaqatigiissillugu imigassamik tunisinerpaaffiusarput.
Nunani avannarlerni tamangajanni, Norge kisiat pinnagu imigassamik tunisineq appariarsimavoq, Norgimimi qaffariaateqalaarsimagami. Imigassamik tunisinerup milliartorneranut nassuiaatigineqarpoq, imigassarsisinnaasut ukiuinik killiliineq unnukkullu pisisinnaanerup killilerneqarnera.
