Imigassartugassatit viinnisugassatillu nammineq tikisissinnaanngussavatit
Pisiassanik Nunatsinnut eqqussuinermut Nunatsinniillu annissuinermut inatsisip qasukkarnissaanik siunnersuut Inatsisartut upernaakkut ataatsimiilerpata naalakkersuisut saqqummiutissavaat.
Tassalu inatsit allanngorpat, 18-ileereersimasut tamarmik viinninik imigassanillu kimittuunik namminneq atugassaminnik eqqussuisinnaanngussapput.
Suliffeqarfiit imigassallersinnaanermut akuersissutinik pigisaqartut, tassa akunnittarfiit, neriniartarfiit pisiniarfiillu, maannamut kisimik viinninik imigassanillu kimittuunik eqqussuisinnaagaluarput.
Naalakkersuisulli niuffanneq maanna ammanerulersinniarpaat. Taamaaliorniarput, ilaatigut iluanaarutit pissusissamisuunngitsumik qaffassissuseqartarnerat qaangerniarlugu, aammali pisisartuusugut qinigassaqarneruleqqulluta. Tassalu ikinngutigut neriartoqqugagatsigit, viinninik imigassanilluunniit kimittuunik qaqutigoortunik alutorsartissinnaanngussavagut.
Qangali taamaaliorsinnaareeraluarpugut, kisianni eqqussinissamut akuersissummik allaffissornartumik qinnuteqaqqaartarneq, qinnuteqaatillu sivisuumik suliarineqartarneri pisarissersuutaasarsimapput. Kisianni akileraartarnermut aqutsisoqarfiup nittartagaatigut tamakkua aaqqinneqarsinnaalissapput. Tassami tassanngaanniit qinnuteqaasiassaq nuisinneqariaannanngussaaq, tassanilu tikisikkumasat allattoriaannaassapput, taavalu ilanngaaserisunut akiligassaq naatsorsorlugu. Ilanngaaserisunullu akiligassat netbankikkut akilerneqarsinnaassapput. Taava najoqqagassat tikinnissaannut utaqqineq kiserngorutissaaq.
Naalakkersuisut siunnersuummut nassuiaamminni oqaatigaat, Nunatsinni aalakoornartulinnik imigassartornerulernissaq siunertarinngikkitsik. Siunnersuulli pisisartunut akitigut iluaqutaassaaq. Pisisartut aamma viinnit imigassallu kimittuut piumanerusatik qinersinnaalissavaat.
Oqaatigineqareersutut pisiassanik eqqussuinermut annissuinermullu inatsisip allannguutai maajip aallaqqaataani atuutilissapput. Allannguutit aamma kinguneranik, inuussutissarsiortut akitsuuteqarfiup avataanut, soorlu uuliasiorfinnut, imigassanik aalakoornartulinnik tunisigaangamik, eqqussinermi akitsuutit akileriikkatik utertitsissinnaalissavaat.
