Imigassartorsimallutik biilertut tigusaasut

Nuummi politiit sapaatip akunnerata naanerani qaangiuttumi imigassartorsimallutik bilertunik sisamanik tigusarinnissimapput.
Allattoq Elisa Isaksen
juulip 21-at 2008 16:54

Tallimanngormat nalunaaqutaq 22.45 tigusarinninneq siulleq pivoq. Taamaalinerani angut 39-nik ukiulik imigassartorsimalluni bilertoq tigusarineqarpoq maannalu biilernermut allagartaminik arsaarneqarnissani akiliisitaanissanilu naatsorsuutigisinnaavai.

Arfininngormat ullaakkut arfineq pingasut qaangilaaraa angut 20-nik ukiulik imigassartorsimalluni biilertoq naammattoorneqarpoq, aamma taanna imigassartorsimalluni biilersimasutut unnerluutigineqassaaq.

Arfininngornermi unnukkut nalunaaqutaq 19.55 Nuup illoqarfittaani angallannermi ajutoortoqarneranik nalunaaruteqartoqarpoq, sunaaffa biili aqqusernup sinaanut nakkarsimasoq, nammineerlunilu qaqeriarluni kinguninngua aqqusernup illuatungaanut nakkaqqissimasoq. 40-nik ukiulik suliffimmi biiliinik ingerlatsisuusoq, imigassartorsimalluni biilersimasutut unnerluutigineqartussanngorpoq.

Sapaammi ullaassakkut nalunaaqutaq 3.40 imigassartorsimalluni biilertoqarneranik nalunaaruteqartoqaqqippoq. Tamatuma misissuiffigineqarneratigut 24-nik ukiulik imigassartorsimalluni biilertoq paasineqarpoq. Aammattaaq paasineqarpoq, angut taanna siornatigut biilernermut allagartaajagaareersimasoq.

Ullaassakkut nalunaaqutaq arfinernut qiteqquttoq aqqusinermi ajutoortoqarneranik nalunaaruteqartoqarpoq. Politiillu biili aqquserngup qeqqani puseqqasoq naammattoorpaat, aquttua qimaareersimasoq. Tamanna politiinit suli misissuiffigineqartoq Nuummi politiit nalunaarutigaat.