Imigassartorsimalluni biilertoq ataaseq
Angerlarsimaffinni eqqissiviilliornerit annertugisassaanngitsut akuttusuumik nalunaarutigineqallattaasut eqqaassanngikkaanni sapaatip akunnera kingulleq kitaani eqqissisimaarfiusimavoq.
Ilulissani angut 57-inik ukiulik imigassartorsimalluni biilertoq ippassaq ualikkut ilisimannittumit nalunaarutigineqarnermi kingorna politiinit tigusarineqarpoq.
Angut tigusarineqarnermi kingorna aaversivigitippoq, misissuinerlu naammassippat paasinarsissaaq angut biilernermi nalaani qanoq imigassartorsimatiginersoq, tassami 1,2 promille qaangerlugu imigassartorsimaguni angallannermut inatsit naapertorlugu ukiuni pingasuni tulliuttuni biilinik ingerlatitsiseqqusaajunnaarsinnaagami.
Nuummi politiit kitaani politiinut sanilliullugit ulapaarnerusarput, soorlu sapaatip akunnera qaangiuttoq aamma taamaattoq. ullut arfineq-maruk ingerlaneranni suliarineqartut ilaatigut tassaapput angerlarsimaffinni eqqissiviilliornerit 14-it, pisiniarfinni tillinniarnerit qulingiluat, ikiaroornartumik katillugu 2,6 grammimik arsaarinninneq. Inuusuttuaqqat pingasut 13-inik, 14-inik 16-inillu ukiullit benzinamik naamaartut aamma politiinut nalunaarutigineqartunut ilaapput. Taakku angajoqqaavi inunnillu isumaginnittoqarfik suliamut tunngatillugu ilisimatinneqarsimapput benzinallu puua naamaarutitut atorneqartoq aamma politiinit arsaarinnissutigineqarluni.
