Imigassartorpallaarunnaarsimanerput nunanit allanit ataqqineqarpoq
Paarisap pisortaa Bodil Karlshøj Poulsen tamanna pillugu ima oqarpoq.
- Kalaallit Nunaanni imigassamik atuinerup affaannanngortissimanera nersualaarneqartarpoq maluginiarneqarlunilu. Aperineqartarpugut tamanna qanoq anguneqarsimanersoq.
Maluginiarneqartarportaaq inuusuttut imigassamik atuinerat annikillisimasoq. Nunanimi avannarlerni imigassamik atuineq annikilliartunngilaq, misilittakkagullu tunniulluakutsoorsinnaavagut, Paarisami immikkoortortami pisortaq Bodil Karlshøj Poulsen oqarpoq.
Taanna Nunat avannarliit ikiaroornartoq pillugu isumasioqatigiinneranni peqataavoq. Danmarkimit, Sverigemit, Finlandimit, Norgemit Islandimiillu ilaatigut peqataasoqarpoq, taakku ullut pingasut ingerlaneranni meeqqat ikiaroornartumik imigassamillu atornerluisunik ilaqutallit pillugit kiisalu tarnikkut nappaatillit ikiaroornartumik imaluunniit imigassamik atornerluisarneri pillugit oqallississapput. Tamatuma saniatigut Nunat avannarliit ikiaroornartup akiornissaanut periusissanik isumaqatigiissuteqarsinnaaneq eqqartussavaat minnerunngitsumillu misilittakkaminnik avitseqatigiillutik.
- Nunat allat misilittagaat ilikkagaqarfigisinnaavagut, suliassat unamminartut aaqqinniagassaat tusagaqarfigasarlugit, suliassaallumi suliassatsinnut assigulluinnarput, Katrine Schjønning Dansk indenrigs aamma sundhedministeriamit peqataasoq oqarpoq.
Kalaallit Nunaanni imigassamik atuinerup annikillisinnissaanut tunngaviit pillugit Paarisami immikkoortortami pisortaq Bodil Karlhøj Poulsen isumasioqatigiittunut nassuiaateqarpoq, naak toqqaannartumik nassuiaasinnaanngikkaluarluni makku patsisaanerarpai.
- Imigassamik pisiniaraanni 18-ileereersimanissaq inatsisaavoq. Imigassamut akitsuutinut politikki, tassami imigassat aalakoornartullit akisupput. Pinaveersaartitsinermik suliniarneq annertullunilu siammasissuummat, soorlu sapaatip akunnera 18-i nunaqarfinni illoqarfinnilu tamani malunnartinneqartarpoq. Politikkikkut malinnaasoqarluarpoq, kommunini inatsisarlunilu kiisalu pingaaruteqartutut taasariaqarpoq nunatsinni imigassamik ikiaroornartumillu atornerluinermut katsorsaaveqalerneq imigassamik atuinerup annikillisinneqarnissaannut patsisaaqataapput, Bodil Karlshøj Poulsen oqarpoq.
