Imigassartornerup kingunipilui pillugit paasititsiniaaneq nutaaq

Heilmann aamma Rosing Nunatta Ataatsimiititaliaqarfiani Isumalioqatigiinnikkut Niueqatigiinnikkullu Aaqqissuusseqqissaarnermik Ilaasortaatitaqarfimmersut - N.A.I.N.A.I. tusarnikuuigit? Oqariartuutaat tassaavoq annikinnerusumik akisussaassuseqarnerusumillu imertalernissarput. Ajoraluartumik imigassaq pillugu siunnersuutitik pitsaasut namminneq puigornikuuaat.
decembarip 05-at 2013 10:08

Peqqissutsimut Attaveqarnermullu Naalakkersuisoqarfik imigassaq pillugu paasititsiniaanerup nutaap Max 4 - Tassa saqqummiunneqarneranut atatillugu taama allappoq... Paasisitsiniaanermi oqariartuutigineqartoq innersuussutigalugu: ataasinnguartorluni imernermi ataatsimi annerpaamik sisamat imertassagitit, arnat sapaatip akunneranut ataasinnguartornermi annerpaamik arfineq marlunnik imertassasut angutillu 14-inik.

Naalakkersuisoqarfik tusagassiorfinnut nalunaaruteqarluni allappoq Nunatsinni sapaatit akunnerisa naaneranni akissarsinermilu imernerusoqartarpoq. Imeriaaseq taanna taaneqartarpoq aalakoorniarluni imerneq, tamannalu inuttut atukkatigut ajortumik pisoqartarneranut, ajutoortoqartarneranut, pinerluuteqartarnernut peqqissutsikkullu ajornartorsiutinut toqqaannartumik pissutaasarpoq. Aalakoorniarluni imerneq tassaavoq imernermi ataatsimi sisamanit amerlanerusunik imerneq.

Peqqissutsimut Attaveqarnermullu Naalakkersuisoq Steen Lynge naapertolugu imerneqarsinnaasut killissaattut inassuteqaatigineqartut pillugit ilisimasat aalakoorniarlunilu imernerit kinguneri pillugit tunngaviusoq tassaasoq, uagut inuiaqatigiittut naapertuuttumik imeriaaseqarneq angusinnaasariaqaripput imigassartortarnerlu tamarmiusoq annikillisillugu.

- Paasisitsiniaaneq arlalipassuartigut nutaaliorneruvoq, quiasaarinermillu tunngaveqarluni. Isumaqarpunga inuusuttut peqqissutsip pitsanngortinnissaanik oqariartorfigissagutsigit aqqutissaasoq. Neriuppunga amerlasuut – inuusuttut utoqqaallu – paasisitsiniaaneq maluginiarluassagaat oqariartuutillu pingaaruteqartut paasillugit, Steen Lynge oqarpoq.

Tusagassiorfik Sermitsiaq.AG aamma Rabotnik paasisitsiniaanermik ilusilersuisuupput. Martin Brandt aamma Eqaluk Høegh, ilaatigut TV-mi aallakaatitanit ”Labrador Kangiann”-it aamma ”Kalak”-mit ilisimaneqartut atorfilinnut Heilmannimut Rosingimullu imigassaq pillugu siunnersuutinik siuaruarterisussanut inuttaapput.