Imigassartornerulerneq Paarisamit ernummatigineqanngilaq
Imigassamik atuineq ukiuni arlalinni annikillisarniarneqaraluartoq, misissuinerit takutippaat imernerulersimasugut. Kalaallit Nunaanni Naatsorsueqqissaartarfiup kisitsisaatai nutaat saqqummersinneqaqqammersut takutippaat, ukiuni kingullerni marlunni imernerulersimasugut.
Taamaakkaluartoq ernumanartoqanngitsoq Paarisaminngaanniit oqaatigineqarpoq:
-Ernumanartoqartippallaanngilarput. Taanna oqarnerlunnerugaluarpoq, kisianni sillimaffigaarput, sulinitsinnilu eqqumaffigalugu suliniutit siunissamiittut takorluukannereernikuuagut, Paarisami siunnersorti Poul Petersen oqarpoq.
Kalaallit Nunaanni Naatsorsueqqissaartarfimmit kisitsisit nutaat takutippaat immiaaqqanik, viinninik imigassanillu siorna eqqussineq ukiumut siulianut sanilliullugu 5 procentimik annertunerusoq. Imigassaq 515.000 liiteri 2005-imi eqqunneqarsimavoq, tassa agguaqatigiissillugu inuit 14-t sinnerlugit ukiullit tamarmik ukiumut 12 liiteri imersimavaat.
Paarisamit anguniarneqartunit 2 liiterinik annertunerupput, Poul Petersen-ili isumaqanngilaq Paarisa tassunga tunngatillugu ajornartorsiuteqartoq. Apeqqutaannginnerarpaa qanoq annertutigisumik imertarnersugut, imertariaaserli imeruloortarnerusoq tassani ajornartorsiutaasutut tikkuarlugu. Imeruloortarneq annersaanermik sumiginnaanermillu kinguneqartarpoq, imigassamillu atuineq allanngortinniarlugu Paarisamit sulissutigineqarpoq:
-Aalakoorniaannarluni imigassartorneq, imigassamillu atuineq tulluunnerusumik atorneqarnissaa sulissutigaarput. Agguaqatigiissillugu 10 liiterinut appartinneqarnissaa anguniagaannaanngilaq, pingaarnertulli imigassap qanoq atorniarneqarnera anguniagaalluni. Taanna aallaavigalugu pinaveersaartitsineq imaluunniit pitsaaliuneq ingerlavoq, tassanilu suleqatigut pingaartorujussuit sineriammiittut, pitsaaliuinermik siunnersortit aamma ilagalutigit suliniartarpugut, Poul Petersen oqarpoq. Imigassamik ajornartorsiuteqarneq imigassaq ikiaroornartorlu pillugit isumasioqatigiinnermi Kangerlussuarmi ingerlanneqartussami eqqartorneqartussanut ilaavoq. Isumasioqatigiinneq nunanit avannarlernit peqataaffigineqassaaq, nunatsinneersullu pitsaaliuinermik suliallit aamma iusmasioqatigiinnermi peqataassapput.
