Imigassartorneq kingunipiloqartitsivoq

Nuna tamakkerlugu politeeqarfinni arlalinni, inuit imigassartornikut sapaatip akunnerata siuliani ulapisitsipput.
maajip 02-at 2011 13:50

Qaanaami angut 30-nik ukiulik, eqqartuussivimmut ullumi sassartinneqarpoq. Angutip ippassaq aalakoortilluni aappani 23-nik ukiulik arlaleriarluni kiinaatigut tukkarsimavaa, kigutai marluk katatsillugit kigutaalu marluk napillugit. Angut sapaatip akunnerini pingasuni tigummigallagassanngortinneqarpoq.

Ilulissani politiit sapaatip akunnerata naanerani angutit marluk persuttaasimasutut eqqartuussivimmut sassartippaat.

Tallimanngormat apriilip 29-ani angut angummit allamit persuttarneqarnermi kingorna  allerua pingasoriarluni napivoq. Persuttaasoq ulluni 28-ni tigummigallagassanngortinneqarpoq.

Arfininngornermi apriilip 30-ani aappariinni savimmik kapoorisoqarpoq. Angut aappani savimmik nissukkut kapisimavaa. Angut ulluni 27-ni tigummigallagassanngortinneqarpoq. Politiit suliaq pillugu annerusumik oqaaseqarusunngillat, suliaq suli misissorneqarmat.

Kulusummi angut aalakoortilluni aapparminut persuttaasimasutut tigusarineqarpoq. Angut arfininngormat eqqartuussivimmut sassartinneqarpoq, sapaatillu akunnerini sisamani tigummigallagassanngortinneqarluni.

Tasiilami angut arfininngormat pinngitsaaleeriarsimasutut tigusarineqarpoq. Angut ippassaq eqqartuussivimmut sassartinneqarpoq sapaatillu akunneri marluk tigummigallagassanngortinneqarluni.

Tasiilami angut 60-it missaanni ukiulik persuttarujussuarneqarsimasoq tallimanngornerup ullaassaani nassaarineqarpoq. Tasiilami politiit suliaq suli misissorpaat, angullu persuttagaasimasoq peqqissiartornerarpaat.