Imigassartorneq juullimi eqqissinermik aseruisinnaavoq

Immiaaqqat snapsilu, ilaqutariit ikinngutigiillu akornanni nerersuaqatigiinnerup nalaani ilaanni pinngitsuugassaaneq ajorput. Nerersuaqatigiinnerup kingorna angerlamut ajorani apuukkaanni taava ilaquttat ikinngutillu ilagalugit nerersuaqatigiinneq aatsaat pitsaasuussimassasoq oqaluttuarineqarsinnaasoq, Dronning Ingridip Napparsimmavissuani nakorsap, Jesper Olesenip oqaatigissallugu aatsaat pissutissaqarsorisarpaa.

- Nerersuaqatigiinnerup kingorna kikkut tamarmik ajoratik angerlamut apuussimappata, taava nerersuaqatigiinneq aatsaat iluatsilluarsimasutut uanga oqaatigisarpara, nakorsaq Jesper Olesen oqarpoq.

Taassumali ulluinnarni suliffimmini naammattoortarpai, ajutumeernerit assigiinngitsut arlaqartut nerersuaqatigiinnerullu kingorna pisartut.

- Imigassartoreernerup kingorna ajutoornissat qaninnerusutullusooq ittarput. Tassami imigassartornerup nalaani puigortarparput aalakoornerup nalaani aamma immitsinnut paarinissarput. Puigortakkatta ilagaat, aalakoorluta silamut issittumut aningaagatta, immaqa skuuginnaalluta quasattunik atisagullu kusanartut oqorpianngitsullu atorlugit, apummut orlusinnaasaratta, tamannalu kingunnerlussinnaavoq mianersuunneqartariaqarlunilu, Jesper Olesen oqarpoq.

Nangillunilu oqaatigaa, maanna taarnerpaaffiup nalaani silallu nillernerpaaffiata nalaani, issi ulorianarsinnaammat ingammik imigassartorsimanerup kingorna. Tassami aalakoortilluta issi timitta malugineq ajungajappaa, naak issimut naleqquttunik atisaqanngikkaluarluta.

- Imigassamik sunnerneqarsimatilluta timitsinni misigissutsivut arriinnerusumik sulisarput. Suut annernarsinnaasut iluamik misigineq ajorpagut. Immaqa tamatta misigisaqarfigisimassavarput, inuk aalakoortoq qanoq itersaruminaatsiginersoq. Inummullu silami apummi uppeqqalluni sinittumut tamanna kingunerlussinnaavoq annertuumik, Jesper Olesen oqarpoq imalu nangilluni oqarluni.

- Taamaattumik imigassartunnginnermi eqqarsarluaqqaarnissaq pisariaqarpoq. Inersimasuugaanni meeraqarlunilu inuussuttuaqqanik, taava taakkununnga miannersoqqusinerit aamma imminut atuutissasut ilisimasariaqarput sapinngisamillu malinniarnissaat pisariaqarluni.

Dronning Ingridip Napparsimmavissuani nakorsaq, Jesper Olesen taama mianersoqqusivoq.