Imigassartorfigeqqusaanngitsoq allineqarpoq
Taamaalilluni illoqarfiup qeqqani aqqusinerni illoqannginnersanilu immiaarartornerup, viinnisornerup imigassartornerullu inerteqqutigineqarnera annertusineqarpoq.
Teknikkeqarnermut Avataangiisinullu Ingerlatsivik allagartarsuarnik ima allassimasunik illoqarfiup qeqqanut nivinngartuilluni ippassaq aallartippoq: ”Aalakoornartulinnik imigassartorneq inerteqqutaavoq”.
Inerteqquteqarneq taamaallaat Brugsenip eqqaanut siusinnerusukkut atuutsinneqaraluarpoq, kisianni inerteqquteqarneq ilaqutariit meerartallit angallaffigisartagaannut aamma atuutsinneqartussanngorlugu kommunalbestyrelsip aalajangiuppaa.
Inerteqquteqarfiusup annertusineqarneratigut politiit sumiiffinni pineqartuni imigassartortunik naammattuuigunik peersitsisinnaalerput. Unioqqutitsisoqarpat politiit peqqussutaanni § 38 naapertorlugu akiliisitsisoqarsinnaavoq.
