Imigassaq pillugu quppersagaq inuusuttunut

Imigassaq imigassamillu atuinerup kingunerisartagai, quppersagaaqqami paasissutissiissutigineqarput. Pinaveersaartitsinermik ingerlatsivik PAARISA, quppersagaaqqamik saqqummersitsisuuvoq, tassanilu oqaatigineqarpoq 18-inik ukioqalernermi aatsaat imigassamik pisisinnaanerup tunngavissaqarluarnera.

Quppersakkami oqaatigineqarpoq, inuup qarasaa 20-t/-30-llu missaannik ukioqalernerup nalaani aatsaat inerivittartoq, taamaammallu inuusuttutut imigassamik atuissagaanni inuunerup sinneranut ajoqusernissamut qaninnerusartoq.

2006-imi 6. klassimiit 10. klassimi atuartut akornanni peqqissuunerup atugarissaarnerullu misissuiffigineqarnerat, quppersagaaqqap saqqummersinneqarneranut tunuliaqutaavoq. Aanngajaarniutinik atornerluisarnerup kingunerisartagaanik meeqqat ilisimasaat killeqaqisut misissuinerup ersersippaa, taamaammallu naatsorsuutigineqarsinnaasoq meeqqat inuusuttullu imigassamik misilittaasartut, tamatuma kingunerisartagai nalullugit.

Quppersagaaraq nutaaq Nunatsinni meeqqat atuarfiini atuartunut akullernut angajullernullu, ilinniarfinnut aalajangersimasunut, aamma pitsaaliuinermut siunnersortinut ulluni makkunani nassiussuunneqarpoq.