Imigassaq kimittooq Ammassalimmi matuneqarpoq

Imigassaq kimittooq matuneqarpoq, aamma Tasiilami meeqqanut ilaqutariinnermullu immikkut suliniartoqarneranut Namminersornerullutik Oqartussat 3,1 miliuunit koruuninik aningaasaliissuteqartussanngorput.
Assi © : Google maps
Allattoq Elisa Isaksen
juulip 01-at 2008 10:38

Iliuusissatut aningasaliisoqarnissaanut ilanngullugu Tasiilap borgmesteria Vittus Mikaelsen paaseqatigalugu imigassat 15 procentit qaangerlugit kimittussusillit nioqqutigineqarnerisa juulip aallaqqaataanit, tassa ullumimiit atuutilersumik matuneqarnissaat aalajangiunneqarpoq.

Tasiilami meeqqat ilaqutariillu immikkut suliniuteqarfigineqarnissaat assigiinngitsunik piffissalersorneqartussatut pilersaarutigineqarpoq, ullumikkullu 3,1 mio. koruuninillu aningaasaliiffigineqartoq piffissaq sivikinnerusoq isigalugu iliuusissanut pilersaarutaasunut aningaasaliinerusoq Ilaqutariinnermut Peqqissutsimullu Naalakkersuisoqarfimmiit tusagassiutinut nalunaarummi erseqqissarneqarpoq. Taamaattorli piffissamut sivisunerusumut Tasiilap kommunianut qanoq pilersaaruteqartoqarnersoq aningaasaliissutissallu qanoq amerlatigiumaarnissaat nalunaarutigineqanngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq