Imigassaq eqqussaq annerulerpoq
Imigassamik aalakoornartortalimmik eqqussuineruleqqissimavugut. Immiaaqqat, viinnit imigassallu kimittuut eqqussorneqarneri ukiuni arlalinni ikileriarsimariarlutik maanna amerliartoqqilerput.
Imigassamik aalakoornartortalimmik eqqussuinerup titartaganngorlugu takutitassiarineqarnera qiviaannarlugu qaffariaat takuneqarsinnaavoq. Ukioq kingulleq immiaaqqat, viinnit imigassallu kimittuut 515.000 liiteri eqqussuunneqarsimapput ukiumullu siulianut naleqqillugu 23.000 liiterimik qaffariarneruvoq imaluunniit Nunatsinni Naatsorsueqqissaartarfiup kisitsisaatai kingulliit naapertorlugit 5 procentip missaani qaffariarnerulluni.
Imigassamik eqqussuineq 2001-miit aappariartuinnavissimagaluarpoq. Taamaattorli siornaak qaffariaqqikkamili qaffakkiartorusaaginnavissimalluni.
Allatut oqaatigalugu nunatsinni 14-inik ukioqalereersimasut tamarmik akoqanngitsumik 12,12 liiterimik eqqussorneqartumik ukiuni taakkunani imigassartortarsimapput. Immiaaqqat eqqussorneqarnerpaajusimapput, imigassaq kimittooq viinnillu malisugaannarlugit eqqussorneqartut amerliartorusaarput.
Imigassanik aalakoornartortalinnik eqqussuinerulersimagaluarluta imaanngilaq imernerulersimasugut. Imaassinnaavoq niuertarfiutillit ukiumik ataatsimik sioqqutillutik imigassamik tuniniagassaminnik tikisitsisarnerat eqqussorneqartut amerleriarsimanerinut peqqutaaqataasinnaasoq.
Imigassap eqqussorneqartup qaffakkiartornerata nunatsinni inuttaasut imernerulersimasinnaanerinik aamma takussutissatut paasineqarsinnaanera Nunatsinni Naatsorsueqqissaartarfimmit erseqqissarneqarpoq. Taamaattumik imernerulersimasinnaavugut.
Taamaalilluta sapaatip akunnerani 18-imi pisussat sioqqullugit eqqarsaatissiilaarpugut.
Imigassaq eqqussorneqartoq piffissap ingerlanerani annikilleriarsimavoq. 1990-imi innuttaasup ataatsip liiterit 15-t affarlu imertaraat – tassa imaappoq imigassaq liiterit sisamaat affaq sinnerlugu ullumernit annerusumik taamanikkut eqqussisoqartarsimavoq.
