Imigassaq akornutaasoq
Tamannali ileqquuvoq pitsaanngitsoq, taama isumaqarpoq Tuluit Nunaanni nakorsaanerit ilaat Sir Liam Donaldson.
- Imigassaq inuiaqatigiinni peqqissutsimut ajornartorsiutaasorujussuuvoq. Imigassaq aserorterisutut sunniuttarpoq aamma imigassap ajoqusigai sumiluunniit takusarpavut, nakorsaaneq aviisimut The Guardian-imut oqarpoq.
Nakorsaaneq taanna Tuluit Nunaanni siullerpaalluni innersuussuteqarluni oqarpoq, meeqqat 15-it inorlugit ukiullit imigassamik misiliitinneqartariaqanngitsut.
Nakorsaaneq isumaqarpoq, angajoqqaat kukkusut, isumaqarunik meeqqatik angerlarsimaffimminni imigassamik tunisarnerisigut, imigassamik atuinermik ilikkartissinnaallugit.
Meeqqat aatsaat 15-it 17-illu akornanni ukioqaleraangata, angajoqqaat nakkutigisaanik imigassamik misiliitinneqartarnissaat, Sir Liam Donaldsonip innersuussutigaa.