Qaanaami immiaaqqat viinnillu tuniniarneqarnerat sassaalliutiginerallu pingasunngormat ulloqeqqanut ammaqqippoq. Ammaaqqinneq borgmester Jens Danielsenip nuannaarutigaa.
- Innuttaasut ileqqortik atorpaat. Imatorujussuaq susoqanngilaq. Qaanaap halleani inuiattut ullorsiorneq ingerlanneqarmat inuit nuannaaqaat, aalakoortunillu takussaasoqanngilaq, borgmesteri oqarpoq.
Naalakkersuisut ataasinngormat ataatsimiinnerminni aalajangerpaat Qaanaami imigassanik 15 % ataallugu aalakoornartortalinnik nioqquteqarsinnaaneq ammaqqinneqarsinnaasoq, taamali pisoqannginnerani piumasaqaataavoq kommunalbestyrelsi ammaaqqinnissamut atatillugu meeqqanut inuusuttuaqqanullu tunngatillugu upalungaarsimaniarluni piareersimasussamik pilersaarummik Naalakkersuisunut tunniussaqaqqaassasoq.
- Taamaalioreerpugut. Pilersaarutigut pillugit nalunaarusioreerpugut, Jens Danielsen erseqqissaavoq.
Imigassanik kimittuunik 15 % sinnerlugu aalakoornartortalinnik qaqugu ammaaqqittoqarnissaa Naalakkersuisunit suli isummerfigineqanngilaq, tassami Qaanaap komiteani suliassatut pilersaarutigineqartut ilaatigullu aallartinneqareersut ingerlatillualernissaat pingaartinneqarmat.
Peqqissutsimut, Pinngortitamut Avatangiisinullu Naalakkersuisoq Arkalo Abelsen oqaaseqartinniaraluaratsigu iluatsitsinngilagut.