Imigassanik nioqquteqarneq avannaani oqallisaavoq
Imigassanik kimittuunik Qaanaami nioqquteqaqqittoqartalernissaanut Kristian Jeremiassen, Siumut sinnerlugu kommunalbestyrelsemi ilaasortaq siunnersuuteqarpoq. Siunnersuutaalu ilaasortaqataanit Qaanaameersumit aamma taperserneqarpoq.
- Assigiinngisitsinersuaq akuerisinnaannginnatsigu, tassa inoqarfinni inukinnerusuni killersuineq atorneqartoq Nunatta sinnerani killilersuisoqanngitsoq. Tassa immikkoortitsinani assigiimmik periuseqarnissaq akuersaarnarneruvoq, Jens Danielsen Siumut sinnerlugu Qaasuitsup Kommuniani kommunalbestyrelsemi ilaasortaq oqarpoq.
Namminersornerullutik Oqartussaasimasut Hans Enoksen siuttoralugu Qaanaami imigassaq 2007-mi matuaat. Taamanikkut filmiliortartoq Karen Littauer qaammatini pingasuni Qaanaameereerluni qallunaat tusagassiorfiinut oqariartuuteqarmat Qaanaami meeqqat sumiginnarneqartut. Tamannali Qaanaarmiut ileqquannut paatsuuisimanertut Jens Danielsenip maanna nalilerpaa.
- Upernalerluni sila issigunnaarluni qaammariartuleraangat aneerusulersarpugut qaamaneq pisariaqartittartaratsigu. Meeqqat tassa sumiginnakkatut taakkartorsimavai uffalu sumiginnarneqaratik aneertut, Jens Danielsen oqarpoq.
- Ernumanartoqanngilaq. Suliniutit assigiinngitsut meeqqanut inuusuttuaqqanullu Qaanaap kommuuniugallaramili ingerlatai komitelu pilersinneqarmat isumannaallisarneqareersimallutik ingerlammata ernumanartoqartutut oqaatigisinnaanngilara, Jens Danielsen oqarpoq.
Qaanaami imigassap kimittuut ammarneqaqqissanersut innuttaasunut tusarniutigineqartussanngortoq, Upernaviup nunaqarfiini aalakoornartortalinnik nioqquteqaqqusinnginneq atuutiinnassasoq kommunalbestyrelse aalajangerpoq. Siumut sinnerlugu kommunalbestyrelsemi ilaasortaq Karl Kristian Kruse siunnersuuteqaraluarpoq Upernaviup nunaqarfiini imigassat aalakoornartortallit nioqqutaaqqilissasut.
- Inuiaqatigiinni imigassamik niuernermi atuiffiusumi inoqarfiit ilaanni matoqqatitsineq uanga tunngaviatigut akuerisinnaasimanngilara. Pissutigalugu inuup 18-leereersimasup nammineq akisussaaffigimmagu inuunermini qanoq atugaqarnissani ingerlanissanilu, Karl Kristian Kruse oqarpoq.
Kisiannili tassa kommunalbestyrelsemi taasisoqarmat qulit siunnersuummut akuersaartut qulit itigartitsimmata, siunnersuut atorunnaarsinneqarpoq. Taasinermi oqarasuaatikkut ataatsimeeqataasoq ataaseq taaseqataanngilaq.
