Imigassamut katsorsaaneq ingerlakkusuppaat
Aamma illuliornissamut aningaasaliisoqarnissaa qinnutigiumaneqarpoq.
Kommune Kujallermi borgmesterissaq Simon Simonsen:
- Tassa soorunalimi qangali kissaatigisimavarput nammineq ingerlatsisinnaanissamik neqeroortoqarpat, tigusinissarput. Nammineq pilersaarusiukkatsinnik pitsaanersumik nunap immikkoortuanut naleqqunnerusumik ingerlatsisinnaaneq qulakkiissallugu.
Maannakkut Nuummut aallarunneqartarput ilaquttat qimallugit, ungasissumut piffissamilu sivisuumi ilaqutariit imminnnut qimaqqasarlutik, Simon Simonsen aamma oqarpoq.
-Ilisimavarput taamatut atornerluisunik katsorsarneqarnissamik kujataani, nunap sinnerasulli pisariaqartitsisoqartoq.
Illuliornissamut ingerlatsinermullu aningaasaliissutaasartut Namminersornerullutik Oqartussat iluanni ingerlanneqaannarsinnaappata, Kommune Kujalleq pilersitseqataarusuttoq aamma oqaatigaa.
Kommuneqarfik Sermeersooq aamma ingerlatserusuppoq, kisianni Qaqiffimmik/Frederiksberg Center-imik isumaqatigiissut tigorusunnagu.
Qeqqata Kommunia isumaqarpoq, akisussaaffik suli Namminersornerullutik Oqartussaniittariaqartoq, ajorinngilaalli namminersortunit ingerlanneqarpat. Qaasuitsup kommuniata ingerlatsineq aningaasatigut patajaatsumik qulakkeeqqaarusuppaa.
