Imigassamut inerteqquteqarneq iluaquteqarpoq
Aasianni GU´mi ingerlatsisut malittarisassaliaannik Ilinniartitaanermut Naalakkersuisoq allanngortitsisinnaanngitsoq akissummi erserpoq. Ilinniartut namminneerlutik inigisami ilaanut akiliuteqartarput taamaalillutillu inigisaminnut akisussaasuullutik, Palle Christiansen allappoq nangillunilu.
- Maluginiartariaqarporli ilinniartut inaat tassaammata ilinniartut ilinniarnerminnik naammassinnissinnaanissaat siunertaralugu, Namminersorlutik Oqartussanit immikkut ittunik atugassinneqarnermikkut inigisaat, Palle Christiansen akissummi allappoq.
Inigisami uumasuuteqarneq, pujortartarneq imigassanillu aalakoornartortalinnik atuinernut atatillugu inimut akiliutigineqaratartut attuumassuteqanngitsut, Palle Christiansen allappoq.
Taassuma akissummini oqaatigaa, malittarisassat suugaluartulluunniit ilinniartut inaannik allaffissornikkut ingerlatsisut kisimik allanngortissinnaagaat.
Malittarisassanik sukaterisoqannginnerani Aasianni ilinniarnertuunngorniarfiup ilisimaligai, Palle Christiansenip aamma eqqaamaqquai, tassa ilinniartut atuakkersornerminnut malinnaavallaarsimannginneri, tillinnartorqartarsimanera najugaqanngitsullu aserorterisarneri amerlisimagaluarmata.
Tamakku ilaatigut pissutigalugit, Palle Christianseni oqarpoq, Aasianni GU´p malittarisassaliaanut isornartorsiutissaqarani, soorlu imigassaq atugaanerisa killilersorneqarnerannut.
Taamatut iliuuseqarsimanermut iluaqutaasut arlaqarput, tassa ilinniartut toqqissillutik ilinniakkaminnik naammassissinnaanerat, ilaatigut aamma inuusuttuaqqanik 18-iliineqanngitsunik atuartoqarmat aammalu meeqqisaarlutik atuartut ininik attartortuusarmata. Kristian Jeremiassenimut akissummini Palle Christiansen allappoq.
