Imigassamik atornerluinermut katsorsartinniarlutik utaqqisorpassuit

Tasiilami imigassamik kimittuumik nioqquteqarneq inerteqqutaagaluartoq, Tasiilami innuttaasut 60-it imigassamik atornerluinermut katsorsartinniarlutik utaqqipput. Ilaqutariinnermut naalakkersuisooq Tasiilamut tikeraarnermi kingorna taama paasissutissiivoq. Ajornartorsiutilli iluarsiniarneqarnissaanut siunnersuuteqartoqanngilaq.
aggustip 28-at 2013 09:20

Tamanna pissutigalugu Demokraatit siulittaasuat Jens B. Frederiksen susassaqarfimmut politikkikkut akisussaasumut Martha Lund Olsenimut § 37 naapertorlugu arlalinnik apeqquteqarpoq. Taamatut inissisimasoqarnerata qanoq qaangerniarnissaa, innuttaasut qanoq sivisutigisumik utaqqinissartik naatsorsuutigissaneraat Naalakkersuisullu susassaqarfiup tamatuma suliniuteqarfiginerunissaanut tigussaasunik pilersaaruteqarnersut Frederiksenip Lund Olsenimut apeqqutigai.

Pissutsit qanoq inissisimaneri tusagassiorfinnut nalunaarummi eqqaaginnarlugit Naalakkersuisut tigussaasunik suliniuteqarnissamut piumassuseqarpasinnginnerat Jens B. Frederiksenip uggoraa.