IMF ulluni makkunani ulapaarpoq

Nunat Avannarlilit Siunnersuisoqatigiivisa Finlandimi katersuunnerini Islandip præsidentiata nalunaarutigaa IMF-imit 12 milliardi dollarsinik atukkinneqaraluarlutik, Island ilorraap tungaanut ingerlalissappat 24 milliardi koruunit suli atorfissaqartissallugit. IMF-ip aningaasanik atukkiisarnini nunanut siuarsagassanut tunngatinnerugaluaraa, aatsaat kingumut ukiut 30-t ingerlanerini nunanut killernut atukkiivoq. Islandili atorniarnerminut toqqaserluutissaqanngilaq; Ukrainemmi sisammik tunisassiornini ajornartoorutigerujussuaramiuk 100 milliardi koruuninik atorniartariaqalersimammat. Ukrainemili naalakkersuinikkut najummassimanartorsiortoqarmat atorniarnerugaluaq maangaannarsinnaavoq. Ungarnilu IMF-imut atorniarpoq, nunanullumi EU-miittunut ataasiakkaanut atorniarlunittaaq. Aningaasanik qanoq annertutigisunik atorniarnersoq ilisimaneqanngikkaluartoq BBC-ip naliliinera naapertorlugu aatsaat taama annertutigisumik atukkiisoqarnissaa ilimagineqarpoq. IMF-imili atorniaraanni piumasaqaatitaqartarmat Ungarnimi aningaaserivissuup erniarititani 3 procentinik qaffappaa, maannalu Ungarnimi erniat procentiat 11,5

IMF-ip tulliullugit atukkinnialerpai Pakistan Hvideruslandilu, aningaasarliornermittaaq eqqugaasimasut. Aningaasarliorneq kangimut ingerlaarsorinarpoq, Rumaniamimi Thailandimilu pappiaqqanik nalilinnik niuerneq ullumi matuneqarmata.