Imeruersaatit eqeersaatitallit inerteqqutaalernissaat oqallisigaat
Naalakkersuisut oqariartuutaat Inuit Ataqatigiit oqaaseqartartuannit taperserneqarpoq.
- Meeqqap aqqaneq-marlunnik ukiullip kialuunniit ikinngunni angajulleq, qatanngunni angajoqqaaniluunniit pisiniaqqusinnaavai, taamaalilluni imeruersaammik eqeersaatitalimmik pissarsiuartarsinnaavoq. Inuusuttut taamaalillutik pinerluttutut isigineqalissapput, Olga Poulsen Berthelsen, tikkuaavoq.
Meeqqat aqqaneq-marluk inorlugit ukiullit tamakkuseqqusaajunnaarnissaannik Malik Berthelsenip siunnersuutaa Atassutip aamma Kattusseqatigiit Partiianit isumaqatigineqanngilaq. Demokraatit isumaqarput, meeqqat tamakkutortannginnissaannik oqaluttuunneqarnissaat angajoqqaat perorsaanerminni akisussaaffigigaat.
Imeruersaatit eqeersaatitallit qanoq sunniuteqapiluttarnersut naqqa tikillugu misissorneqarnissaat pisariaqarpoq. Siunnersuut marsip naalernerani oqaluuserineqaqqitsinnagu kaammattuut taanna Peqqinnissamut ataatsimiititaliamut nassiunneqareerpoq.
Imeruersaatit eqeersaatitallit 12.000-it missaat Brugsenip Pisiffiullu qaammammut tunisarpaat, meeqqallu aqqaneq-marluk inorlugit ukiullit imeruersaatinik taamaattunik atuinissaat Nerisaqarnermut Siunnersuisoqatigiit nangaasaarutigereerpaat, tassami kaffip eqeernartua ilaatigut eqqissiveerutsitsillunilu toqqissiveerutsisinnaammat.
