Imeruersaatit eqeersaatitallit atugaaleraluttuinnarput
Nuummi pisiniarfiit ilaannit Kamimmit imeruarsaatit eqeersaatitallit assigiinngitsut tunisaalluarput.
Pisiniarfik Kamik imeruarsaatinut nioqqutigisaminnut erseqqinnerusunik malittarisassiorsimanngilaq:
- Sapinngisarli naapertorlugu inuusuttunut 15-inut 16-inulluunniit ukiulinnut killeqartitsiniartarpugut. Pisisartullu 16-iniit qummut ukiullit imeruarsaatinik koffeininik eqeersaatitalinnik annermik pisisartuupput, Kamimmi pisiniartitsisoq, Mina Murhardt oqarpoq.
Meeqqat imeruersaatinik eqeersaatitalinnik imersimagaagamik uummamminnik kassuttoortarput sajuttarlutillu. Imeruarsaatit koffeininik eqeersaatitallit pillugit Nerisaqarneq Pillugu Siunnersuisooqatigiit ippassaq tamanut nalunaaruteqarput.
Imeruarsaatit koffeinimik eqeersaatitallit mianersuutassaapput. Koffeinip saniatigut sukkoqartorujussuuvoq immaqalu vitamineqalaarluni, nalinginnaasumilli nerisaruit imeruersaatit taakku pisariaqanngillat. Taamaammat imeruersaatit koffeinimik akoqarpallaarneri peqqutigalugit meeqqat aqqaneq marlunnit ukioqalersimanngitsut imertassanngikkaat Nerisaqarneq Pillugu Siunnersuisooqatigiit innersuussutigaat.
