Imeruersaatit eqeersaatillit killilersimaarniarpaat
Pisiniarfiit arlallit ullumimiit atuutilersumik atuarnerup nalaani imeruersaatinik eqeersaatitalinnik meeqqanut atuartunut tunisissaarput.
Meeqqat atuartut qillertuusamik Cultimik imaluunniit Red Bull-imik tigumiartut takussaaqaat, taakkulu imeruersaatit eqeersaatitaqarput. Sulisitsisut, CSR Greenland aamma Kommuneqarfik Sermersooq suleqatigiillutik imeruersaatinik tamakkuninnga meeqqanut atuartunut tuniniaasarneq annikillisarniarpaat.
Isumaqatigiissummi suleqataanissaq nammineq piumassuseq naapertorlugu ingerlasussaavoq.
- Isumaqatigiissut nammineq piumassuseq malillugu atuutsinneqartussaq malillugu nerisassaarniarfiit inuiaqatigiinni akisussaaqataaffittut isigaat meeqqat atuarnerup nalaani imeruersaatinik eqeersaatitalinnik atuinnginnissaasa suleqataaffiginissaa. Taama iliorpugut tamakkuninnga atuivallaarnerup kinguneri takuneqartareermata, Sulisitsisut peqatigiiffiat GA taama nalunaarpoq.
- Nerisassaarniarfiit angajoqqaat akisussaaffiannik tigusinianngillat, taamaattorli piffissami angajoqqaat qitornallu avissaarsimaneranni ikiuukkusullutik, GA nalunaarpoq.
Inuussutissalerinermut aqutsisoqarfiup aamma mianersoqqussutigaa imeruersaatinik eqeersaatitalinnik meeqqat atuinissaat. Koffein imeruersaatiniittoq pissutigalugu meeqqat uumilaqqajaalersarput aammalu malinnaasinnaanerat annikillisarluni.
Suliffeqarfiit makku isumaqatigiissummi peqataapput: Brugsen, Pisiffik, Spar, Natalies Vin & Gastronomi, Nope Discount og Nivi i Ilulissat, Ilulissat Center Marked kiisalu Super Rema Uummannamiittoq.
