Imerpalasunik nassatanut tigummiartarissanut malittarisassat nutaat

EU isumannaallisaalluni nakkutilliinermi imerpalasunik nassatanut tigummiartarissanut malittarisassanik nutaanik eqqussivoq. Nunatsinnit nunanut tamalaanut angalaniartut 2014-imi februaarip aallaqqaataanit imerpalasunik nassatat tigummiartarissat takutittalernissaat sungiunniartariaqassavaat. Aammattaaq 100 ml- sinnerlugu nassataqaraanni, tamanna pillugu apersorneqarsinnaaneq piareersimaffigineqassaaq.

- Ilaasut imerpalasunik nassatatik saqqummernissaat isumannaallisaallunilu sulisunut takutinnissaat februaarip aallaqqaataanit sungiunniartussanngorpaat. Kangerlussuarmit ilaasut periaatsimik nutaamik sungiussilertupallaannissaat ilimagaarput, Mittarfeqarfinni isumannaallisaanermut pisortaq Jens Chr. T. Nielsen oqarpoq.

Isumannaallisaallunili periaasissaq nutaaq sivikitsuinnaassanersoq imaluunniit sivisunerussanersoq oqaatigisinnaanngikkallarpaa.

- Angalasut imerpalasunik, soorlu nakorsaatinik, meeraaqqat nerisassaannik, eqqiaatinik allanillu nammineerlutik qalluillutik takutitsisalernissaat sukkasinnaavoq, aammali ilaatigut sivisunerusinnaasassalluni, nassuiaavoq.

Malittarisassat nutaat imerpalasunik qanoq annertutigisunik nassartoqarsinnaaneranut allannguuteqartitsissanngillat. Nassatani tigummiartarissani imerpalasut puullit annerpaamik 100 ml-inik imallit nassaqqusaapput, (deciliteri ataaseq). Aamma imerpalasunik puulinnik arlalinnik nassartoqqusaavoq, tamarmillu puussiamut akimut ersittumut liiterimik ataatsimik imaqarsinnaasumut poorneqarsimappapput.

Meeraaqqanulli nerisassat, nakorsaatit nerisassallu immikkut ittut kisiisa 100 ml.-it sinnerlugit siunissami nassaqqusaalissapput.

EU-p malittarisassai nutaat USA-mi malittarisassanut qanillattortinneqarput, siunissamilu malittarisassat assigiit atorneqalertussaassallutik. Naak Nunarput EU-mut ilaasortaanngikkaluartoq Kangerlussuarmi mittarfik EU-mit akuerisaavoq, taamaattumillu ilaasut tassanngaanniit nunanut tamalaanut ingerlaqqinniartut malittarisassat taakku malittariaqassallugit.