Imernikinnerugit - misigisaqarnerullutillu: - Imigassaq torinngitsuliortitsisarpoq

Ilinniarnertuunngornianut filmiliornermik unammisitsisoqarnera imigassartakinnerusumik nuannannissamut qanoq iliortoqarsinnaaneranut takutitsisoqassaaq. Nuummilu GUX-imi ilinniartunut marlunnut tamanna eqqarsalersitsivoq.
Nuummi GUX-imi ilinniartut marluk, Millie Louise Rasmussen aamma Veronika Hansen sapaatip akunnerata siuliani sisamanngornermi filmiliornermik unamminermi ’Imernikinnerugit – misigisaqarnerullutillu’-mi peqataapput, unammisitsinermilu ajugaasut imigassartaqanngitsumik ullaakkut festernissamik ajugaasussaapput. Assi © : KNR
Allattoq Mette Nørmark, Anton Gundersen Lihn
oktobarip 07-at 2019 10:52
Nutserisoq Ivik Kristiansen

Nuummi GUX-imi atuaqatigiiaat arfineq-pingasut paasisitsiniaanermik pitsaanerpaamik filmiliorniarlutik unammimmata, videoliuutit, najoqqutassiat immiussanillu aaqqissuussissutit takussaapput.

Neriuffiit Kattuffiata Trygfondenillu suleqatigiillutik imigassaq pillugu paasisitsiniaaneq "minnermik imerit - misigisaqarnerugit" aaqqissuussaraat, tassanilu nunatsinni Danmarkimilu ilinniarnertuunngorniarfiit 27-t paasisitsiniaanermik pitsaanerpaamik filmiliorniarlutik unammeqataapput.

Unamminermi aalakoornartutaqanngitsumik ullaakkut festerneq pingaarnertut akissarsissutaassaaq.

Veronika Hansen Mille Louise Rasmussenilu Nuummi GUX-imi 3.g-mi ilinniartuupput.

Festernermi imigassaq atugaangaatsiartartoq

Imigassaq festernerlu immikkoortikkuminaattut Mille Louise Rasmussen oqarpoq.

- Festeqataagaangama kina aalakoornerpaajusinnaanersoq, kinalu silaqanngitsuliornerpaajusinnaanersoq pineqarnerugajuttarput. Taamaammat imigassaq festini ilaasorujussuusarpoq, Mille Louise Rasmussen oqarpoq.

AAMMA ATUARUK Ilinnniarnertuunngorniarfimmeersut imigassamut pinaveersaartitsillutik suliaqalersut

Veronika Hansen filmilioqataareerluni imigassartortarnerullu kinguneri pillugit saqqummiinermut tusarnaareerluni eqqarsaateqalerpoq.

- Ullup ingerlanera paasisaqarnartupilussuuvoq. Soorlu nuannisaarniarluni aalakoortoqartartoq siusinnerusukkut oqartoqarpoq. Kisianni ilumut nuannisaarnerua? Aalakoornartoq nuannisaartitsivoq, Veronika Hansen oqarpoq.

Inuusuttulli imigassartornissaminnut pinngitsaalineqanngillat. Taava sooruna taama imigassartortigisartut?

- Allatuulli imertigisimanngikkaanni nikallunganalaartarpoq. Ilaanngitsutut misigisimanartarpoq. Allatuulli aalakoortiginissamik misigisimagaanni taava tassa allatuulli aalakoortigilernartarpoq, Mille Louise Rasmussen oqarpoq.

Qaammarsaaneq allannguissanersoq qularnartoq

Ullullu ingerlanera eqqarsalersitsigaluartoq imigassamut allaanerusumik isiginnilernissaq qularnartoq Veronika Jensen oqarpoq.

AAMMA ATUARUK Immiaaqqat aalakoornartortaqanngitsut nioqqutaalernissaat taperserneqartoq

- Qanoq iliulerneq qanorlu aalajangilerneq pillugit soorunami eqqarsaqqeqqaartarnissaq pillugu qulanngilanga. Sunami tamarmi kinguneqartarpoq. Kisianni sianiilliornerit pinngitsoortinneqassanersut naluara. Aalakoornartormi aalakoornartuuvoq, taannalu sianiillisitsilaartarpoq, Veronika Hansen oqarpoq.

Nunatsinni ilinniarnertuunngorniarfinni aatsaat unammeqataasoqaasoqarpoq.

Nuummi GUX-imi filmiliaalluarnerpaaq ilinniarnertuunngorniarfinni 26-ni filmiliaalluarnerpaanut unammissaaq.

Aalakoornartortalimmik imigassartaqanngitsumik kikkut ajugaasuussanersut decembarip ulluisa 13-ianni aalajangerneqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq