Imerniartarfinni pujortaqqusinnginneq

Danskit naalakkersuisuisa pisortat suliffeqarfiini tamani pujortartarneq inerteqqutaatilerusuppaat.

- Pujortartarunnaarnissamik inatsit aappagu apriilip aallaqqaataaniit atulissaaq sulisullu sulinerminni pujortaqqusaajunnaavissapput, peqqinnissamut ministeri Lars Lykke Rasmussen oqarpoq. Erseqqissarlugulu ataasiakkaat immikkut allaffimminni pujortaqqusaajunnaassapput kiisalu ininik immikkut pujortartarfeqartoqarunnaassaaq.

Sulisummita tamanna qanorigissaneraat DR-imi tusagassiortumit aperineqarami ima akivoq:

- Sulisut amerlanerit nuannaatsannissaat ilimagaara. Uattulli pujortartartut uattulli eqqarsassagunarput; artornassaqaaq sivitsoriarpalli inatsisip ikiorneratigut sapiukkunnaariartulernissara ilimagaara. Pujortartartullu 25 procentiisa pujortarunnaarnissartik kissaatigigunaraat ilimagigakku pujortarunnaarnissamik inatsiseqalernitsigut ikiorserneqarnissaat neriuutigineruara, Lars Lykke Rasmussen oqarpoq.

Pujortartartummi toqqortorlutik pujortartalernissaat ilimagineqarnersoq DR-imit aperineqarami akivoq:

- Tamanna ilimaginngilara. Nunani allani inatsisit pujortartartunit malinneqarluinnarmata Danmarkimi innuttaasunit malinneqarnissaat ilimagineruara. Assigiimmik inatsiseqartitsisoqartillugu kikkut tamarmik naluneq ajorpaat inatsisit qanorittuunersut, Lars Lykke Rasmussen naggasiivoq.

Danskit naalakkersuisuisa inatsisissatut siunnersuutaanni neriniartarfinni kaffisortarfinnillu pujortartarnerup inerteqqutaalernissaa aamma siunnersuutigineqarpoq.

Imerniartarfinni nerisassanik sassaallerfiunngitsuni ini 100 kvadratmeterinik minnerutillugu qanorsuarluunniit pujortartoqarsinnaassaaq.