'Imerniartarfiit sapaatikkut matoqqatinneqartalerlit'
- Sooq imerniartarfiit sapaatikkut, ilaqutariit ataatsimooqatigiillutik eqqissisimaarfigisartagaanni, ammasassappat, aamma sooq sapaatikkut naalagiartilluta inuit aalakoortorujussuit naapittuartassavagut, Agathe Fontain Sermitsiami kingullermi saqqummersumi taama aperivoq.
Taamaattumik nunatsinni imigassamik atuineq pillugu Nuummi isumasioqatigiinnissaq septemberimi pisussaq Agathe Fontainip suliniutigaa.
- Imigassamik atueriaatsitta napparsimalersittarpaatigut tamannalu uanga akuererusunngilara, nunatsinni peqqinnissaq pillugu akisussaasut qullersaat oqarpoq.
Sermitsiap paasissutissiinera naapertorlugu siunnersuut IA-p qanittukkut ataatsimeersuarnerani eqqartorneqareerpoq. Tassani inatsisartunut ilaasortaq IA-meersoq Storm Ludvigsen akerliliivoq:
- Killilersuinerit nutaat killormoornermik kinguneqartarput taamaaliornerlu imernerulernermik kinguneqaannassaaq, taamaalillunilu sukaterineq iluanaarutissartaqanngilaq, Storm Ludvigsen oqarpoq.
Ukiuni kingullerni imigassamik atuineq apppariaateqarsimagaluartoq, imigassartornerup kingunipilui malitsiganik appariarsimanngillat. Tamannalu sukaterinermik suli annertunerusumik pisariaqalersitsisoq, Agathe Fontain isumaqarpoq.
Nunatsinni innuttaasut 14-ileereersimasut siorna agguaqatigiisillugu 10,43 literimik imigassamik akoqanngitsumik imersimapput. 1987-imi imigassartorneq qaffasinnerpaaffimminiikkallarmat 14-ileereersimsut tamarmik 22 literip missaani imigassartorsimapput.