Imermik tunisassiulernissaq isertitsissutaalluassaaq

Puiaasaq imermik Qeqertarsuarmeersumik imalik siulleq 2008-mi upernaakkut nioqqutigineqassaaq.

Tunisassiulersussat Greenland Spring Waterip siulersuisuini siulittaasoq, Guido Frank, tusagassiortunik ippassaq unnukkut katersortitsinermi taama oqarpoq.

Imeq Qeqertarsuarmeersoq taaguuteqassaaq ”Imeq”.

Guido Frankip eqqoriarpaa, imeq 50 aamma 70 millioni euro-nik ukiuni tulliuttuni pingasuniit tallimanut isertitsissutaajumaartoq, aningaasalli tamarmik Qeqertarsuarmut tutsinneqarnavianngillat ilarpassui tuniniaanermut aamma atorneqassammata.

Guido Frankili eqqoriaavoq 200 millioni koruunit nalingi nunatta siunissami isertittalersinnaassagai.

Ingerlatseqatigiiffik Greenland Spring Water marlunnik piginnittoqarpoq, 51 procentit schweizimiut suliffeqarfiutaannit Thoconimit pigineqarput, 49 procentit kalaallinit pigineqarlutik.

Siulittaasup oqaatigerusunngilaa kikkut allat tunuliaqutaanersut, oqarlunili kalaallit suliffeqarfiutaat pingasut massakkut isumaqatigiissuteqarfiginiarneqartut.

Qeqertarsuarmi tamanut ammasumik unnugu ataatsimiisitsoqassaaq, pilersaarutit innuttaasunut saqqummiunneqassallutik.