Imermik tunisassiornissaq kinguartoorpoq
Qeqertarsuarmi imermik tunisassiornissaq ukiup ataatsip missaani kinguartoortussanngortoq Greenland Springwaterimiit nalunaarutigineqarpoq.
Puiaasat tunineqartussat ukiup aappaata affaata missaa qaangiuppat, 2008-p naajartornerani, tuniniarneqarlutik aallartissasut piginneqatigiiffiup naatsorsuutigaa. Tuniniaanissaq pilersaarusiorneqaqqaalermat tuniniaanerup 2007-imi aallartinnissaa pilersaarutigineqaraluarpoq.
Tunisassiorfiup umiarsualivissallu sananeqarnissaasa tunisassiulernissaq kinguarsarsimagaat Greenland Springwaterimiit nalunaarutigineqarpoq. Sanaartugassat ukiumi nutaami aatsaat sananeqarlutik aallartinneqarsinnaanissaat piginneqatigiiffiup naatsorsuutigaa.
240 million koruunit ukiuni tulliuttuni aningaasaliissutaassasut Greenland Springwaterip naatsorsuutigaa.
Kalaallit suliffeqarfiutai piginneqataasinnaanersut suli isumaqatiginninniarfigisarlugit piginneqatigiiffik nalunaarpoq. Piginneqatigiiffik soqutiginnittoq qanittukkut Københavnimi ataatsimeeqatigineqaqqammivoq – piginneqatigiiffiulli qanoq ateqarnera isertuunneqarallarpoq.
