Imermik tuniniaaneq Nunatta nittarsaanneqarneranut iluaqutaassaaq

Erngup ilulissanit pisup tuniniarneqarnissaanut Naalakkersuisut ullumi akuersipput.

Erngulli tunisassiarineqarnissaa kisimi eqqarsaatigineqanngilaq - tassami Kalaallit Nunaata pitsaasumik nittarsaanneqarneratigut aningaasaliisinnaasunik nutaanik periarfissiisinnaanissaa neriuutigineqarpoq.

Imeq sermimit pisoq assaat atorlugit puiaasanut maqinneqartassaaq. Puiaasaq erngup poorisassaa, immikkut ilusilersukkamik sanaajuvoq, simianut allaat igalaaminermik sanaajulluni. Puiaasaq ataaseq 300 koruunit missaannik akeqassaaq, naalagaaffimmi inoqajuitsoqarfimmi Dubaimi tuniniarneqartussaalluni.

Dubai uuliasiorfissuuvoq, nunamilu uulia pigineqartoq imermit annertunerulluni.

- Erngup tuniniarneqarneratigut Kalaallit Nunaat pitsaasumik nittarsaanneqassaaq. Pitsaassuseq najoqqutarineqassaaq. Erngup tunisassiarineqarnerani atortorissaarutit atorneqassanngillat, erngup tunisassiarineqarnissaannut suliniuteqartoq Julien Caquineau franskiusoq, ukiut pingasut kingulliit Kalaallit Nunaanni najuguaqarsimasoq, oqarpoq.

Imeq tunisassiarineqartussaq qanoq mamassuseqarpa?

- Susunneqassanngilaq. Minguingaarmat nutaajungaarmallu susunninnera malugisinnaassanngilat, Julien Caquineau oqarpoq.

Dubaimi uuliaatilissuit sheikit kisimik imermik pisinissamut ukiumik ataatsimik sivisussuseqartumik qulakkeerinnipput.

Erngup sermimit pisup susunneqannginnera Dubaimiut mamarilluarpaat, aamma puiaasat imermik sermimeersumit imaqartut 30.000-it inniminnereersimavaat.

Suliffeqarfimmi takornarianillu sullissivimmi Destination Avannaani pisortap Per Rosing-Petersenip, erngup immikkut illuinnartup tuniniarneqarnissaa Kalaallit Nunaannut periarfissiisusaasoq oqatigaa.

- Imeq tassaavoq Kalaallit Nunaanni pisuussutsit uumaatsut ilaat, avammut tuniniassallugu suliniutigisariaqartoq, taannaavormi Kalaallit Nunaata avammut nittarsaaneqarneranut atorneqartoq, Inussusutissarsiornermut Naalakkersuisoq Ove Karl Berthelsen oqarpoq.

Inuussutissarsiornermut Naalakkersusioq puiaasamik ataatsimik 300 koruuninik akiliilluni piserususinnaava

- Avatangiisinni imermik naammattumik peqarmat pisinavianngilanga, taamaattoq nunarsuarmioqatitta ilaannik akissalinnik imermillu pisariaqartitsusunik peqarpoq, taakkuuppullu imermik tuniniaaffigineqartussat, Ove Karl Berthelsen oqarpoq.

Julien Caquineau neriuppoq, imeq Ilulissat eqqaannit pisoq Kalaallit Nunaanni siunissami tuniniarneqalerumaartoq, akikinnerusumik.