Imermik sipaarneq akilersinnaanngilaq
Ajornartorsiut nutaajunngilaq, naallu Inatsisartut Peqqussutaanni 2005-imeersumit inissiani attartorneqartartuini atuineq malillugu imermut januarip aallaqqataat 2010 tikitsinnagu uuttuusersuisoqarsimanissaa siunniunneqarsimagaluartoq, Inissianut INI-p ingerlataanut8000-inut tamanna suli pisimanngilaq:
- Mamaattorujussuuvoq akiligassap agguaannarneqartarnera atuineq malinnagu. Tassami nalunngilarput kallerup inneranik atuisut tamarmik, immikkut tamarmik atugartik malillugu akiliisarput. Uagulli soorlu najukkatsinni sipaaraluaruttaluunniit allat atuinerannut akilersuinerit mamaattorujussuuvoq, Jonas Thygesen oqarpoq.
Qeqertarsuarmiu Jonas Thygesen siorna taperpoq, aamma siornaak 2011-mi peqqissarnini pissutigalugu inigisani qaammatit tallimangajaat najunngikkaluarlugu aamma tapertinneqarpoq:
- Taavalu 2011-mi peqqissarnera pissutigalugu, najugara qaammatit tallimangajaat najorsimanagu, akiliuuaannarlunga, taavalu kisiani aamma taperlunga naatsorsuutit takkummata, Jonas Thygesen oqarpoq.
Inatsisartut Peqqussutaat nr. 2 maajip 12-ani 2005-imeersoq najoqqutaralugu Namminersornerullutik Oqartussat kommunillu inissiaataat januaarip aallaqqaataat 2010 nallertinnagu immikkut atuineq malillugu uuttuutinik ikkussiffigineqareersimasussaangaluarput. Tamatumani imermut akiliuteqartarnermut sipaartoqarsinnaanera siunertarineqarsimagaluartoq, Ineqarnermut
Pisortaqarfimmi pisortaagallartoq, Olafur P. Nielsen nassuiaavoq:
- Anguniarneqarsimagaluarpoq imermik atuisut aamma taakkuussasut akiliisussat, Olafur P. Nielsen oqarpoq.
Taamaattorli peqqussummi aamma sillimaffiginiarneqarsimavoq uuttuutinik ikkussuinissaq najugaqatigiiffiup aningaasaqarneranut nammakkeeratarsinnaanera. Tamannarpiarlu pissutigalugu inissiat pisoqaanerusut ikkussuiffigineqarsimanngillat.
Inissianimi taakkunani imermut ruujorit illup naqqaniit kiassaatinut, anartarfinnut errorfinnullu atatinneqartarput.
Taamaalillunilu inissiani taakkunani atuinermut uuttuutinik ikkussuisoqassappat, inissiat tamarmik imermut ruujorii, aningaasartuutaangaatsiartumik ikkussiffigineqartariaqartut Olafur P. Nielsen nassuiaavoq:
- Inissiami kuutsiinnartakkamik anartarfilimmi, uffarfilimmi, errorfilimmi, iggavilinni ikuallattoornissamullu slangilimmi, uuttuutit arfinilinniit arfineq pingasut tungaannut ikkunneqartariaqassapput. Tamannalu najugaqatigiiffiup aningaasaqarneranut artukkeerujussuarsinnaavoq, Olafur P. Nielsen oqarpoq.
Olafur P. Nielsenip Jonas Thygesen allallu taannatut inissisimasut, atuineq malillugu uuttuutinik ikkussuisitsinissamut tinnersaaqataasinnaasut erseqqissaavoq:
- Inissiaqarfinni angivallaanngitsuni najugaqarunik, najugaqartut oqartussaaqataanerminnik atorluaasinnaapput. Ukiummi tamaasa aningaasaqarnermut missingersuusiornissamut aggersaasoqartarpoq. Ataatsimiinnermi tassani siunnersuuteqartoqarsinnaavoq uuttuutinik ikkussuisitsisoqarnissaa anguniarlugu ineqarnermut akiliutip qaammammut 100 koruunik qaffanneqarnissaa. Tamanna aamma periarfissaavoq, Olafur P. Nielsen oqarpoq.
Inissiaatileqatigiiffik INI A/S-ip inissiat 9.364-it aqutarai, taakkunanngalu 7850 imermut uuttuusersorneqarsimanngillat.
